چیئرمین جوائنٹ چیفس آف اسٹاف کمیٹی کا دورہ روس ، 'امن مشن مشق 2021' کا معائنہ

پاک فوج کے شعبۂ تعلقاتِ عامہ (آئی ایس پی آر) کے مطابق امن مشن مشق 2021  شنگھائی تعاون تنظیم کے تحت منعقد ہوئی ۔ چیئرمین جوائنٹ چیفس آف اسٹاف جنرل ندیم رضا نے ایس سی او کے رکن ممالک کے چیف آف جنرل اسٹاف کے اجلاس میں بھی شرکت کی۔ اجلاس میں افغانستان کی صورتِ حال اور عالمی و علاقائی سیاسی امور پر تبادلۂ خیال کیا گیا، دہشت گردی سے متاثرہ علاقوں میں بین الاقوامی دہشتگرد تنظیموں کی سرگرمیوں پر بھی گفتگو کی گئی۔

اس موقع پر جنرل ندیم رضا نے کہا کہ پاکستان خطے میں امن، ترقی اور استحکام کے لیے ایس سی او کے ساتھ کام جاری رکھے گا۔جنرل ندیم رضا نے عالمی امن کے لیے پاکستان کی مسلح افواج کی شراکت پر اظہارِ خیال کیا اور دہشت گردی کے خلاف جنگ میں پاک فوج کی قربانیوں پر بھی روشنی ڈالی۔

جنرل ندیم رضا نے روسی فیڈریشن کے چیف آف جنرل اسٹاف جنرل ویلری وی گیرا سیموف اور پیپلز لبریشن آرمی چین کے چیف آف جوائنٹ اسٹاف جنرل لی زوچینگ سے بھی ملاقاتیں کیں۔ملاقاتوں کے دوران جنرل ندیم رضا نے کہا کہ پاکستان روس اور چین کے ساتھ دفاعی تعاون آگے بڑھانے کو بہت اہمیت دیتا ہے، باہمی تعلقات بامقصد،دوررس اسٹریٹجک تعاون کی شکل اختیارکررہےہیں،  پاکستان یقین رکھتا ہے کہ بہتر تعاون سے بامعنی اور طویل مدتی اسٹریٹجک تعلقات استوار کریں گے۔