آئندہ انتخابات میں بھی عمران خان کامیاب ہو کر حکومت بنائیں گے:فواد چوہدری

تفصیلات کے مطابق میڈیا سے گفتگوکرتے ہوئے وفاقی وزیر اطلاعات کا کہنا تھا کہ چیئرمین نیب کے حوالے سے وزیرقانون اور اٹارنی جنرل کام کر رہے ہیں جبکہ چیئرمین نیب کی تقرری کے لیے شہباز شریف سے مشورہ نہیں کریں گے، ان سے مشورہ ایسے ہی ہے جیسے چور سے پوچھیں کہ تفتیشی کون ہونا چاہیئے۔

فواد چوہدری کا کہنا تھا کہ کنٹونمنٹ بورڈ الیکشن میں تحریک انصاف نے کلین سوئپ کیا، اگلے لوکل گورنمنٹ انتخابات میں تحریک انصاف کامیاب ہوگی، مسلم لیگ ن اور پیپلزپارٹی میں ٹکٹ لینے والے لوگ نہیں ہیں۔

ان کا کہنا تھا کہ ن لیگ نے الیکشن لڑنے کیلئے لوگوں کو 5 کروڑ روپے کی آفر کی،ن لیگ اور پیپلزپارٹی ٹوٹی ہوئی اور بکھری ہوئی پارٹیاں ہیں،آنے والا الیکشن مسلم لیگ ن اور پیپلزپارٹی کیلئے آخری الیکشن ہوگا۔

انہوں نے کہا ہے کہ وزیراعظم عمران خان پاکستانی عوام کے دلوں کی ترجمانی کرتے ہیں،انہوں نےبھارتی وزیراعظم نریندر مودی کو للکارا،کلبھوشن گرفتار ہوا تو نواز شریف نے کہا کہ ایسے تو لوگ آتے جاتے ہیں، ماضی میں بے شرم لوگ پاکستان میں حکمران رہے ہیں۔

ان کا مزید کہنا تھا کہ نواز شریف کی حالت اشرف غنی جیسی ہے، دونوں ایک جیسی زندگی گزارنے پر مجبور ہیں،دونوں ڈالرز کے بیگ بھر کے باہر چلے گا۔