وزیراعظم کے آرمی چیف سے خوشگوار اور قریبی تعلقات ہیں: فواد چوہدری 

تفصیلات کے مطابق وفاقی وزیراطلاعات کا کہنا تھا کہ وزیراعظم سمجھتےہیں تاریخ میں کبھی سول ملٹری تعلقات اتنے اچھے نہیں رہے جتنے آج ہیں،اس کا کریڈٹ آرمی چیف کوجاتا ہے۔

انہوں نے کہا ہے کہ جنھوں نے ہمیشہ جمہوریت اور سول حکومت کو ادارہ جاتی سپورٹ فراہم کی،پورے پاکستان کو جو وقارعزیز ہے،یہی جذبہ برقرار رہے گا۔

فواد چوہدری کا کہنا تھا کہ ڈی جی آئی ایس آئی کی تعیناتی سے متعلق معاملات طے پا چکے ہیں،ڈی جی آئی ایس آئی تعیناتی جلدہو جائے گی،سول ملٹری دونوں فریقین میں اس پر اتفاق ہے۔

وفاقی وزیراطلاعات کا کہنا تھا کہ مہنگائی کے مسئلے پر وزیراعظم نے بات کی،مہنگائی کی بنیادی وجہ عالمی مارکیٹ میں قیمتوں میں اضافہ ہے۔ 

انہوں نے کہا ہے کہ نئی معاشی پالیسی بنائی ہے، انشااللہ نومبر سے تین بڑے پروگرام لانچ کرنے جا رہےہیں، صحت کارڈ، کسان کارڈ اور حساس کارڈ کے منصوبے لانچ کیے جائینگے،پنجاب میں ہر خاندان کو صحت کارڈ دیا جائے گا۔ 

ان کا مزید کہنا تھا کہ افغانستان کیلئےویزا سہولت آسان کر دی،افغانستان کیساتھ تجارت کو بھی بڑھایا،چاہتے ہیں دنیا بھی افغانستان کو تنہا نہ چھوڑے،افغانستان عدم استحکام کا شکار ہوتا ہے توانتہا پسند گروہوں کے فعال ہونے کا خدشہ ہے۔