وزیرخارجہ کا مقبوضہ کشمیرمیں بھارتی جارحیت پراقوام متحدہ کو خط

تفصیلات کے مطابق وزیرخارجہ شاہ محمودقریشی  کی جانب سے اقوام متحدہ جنرل سیکرٹری اور صدرسلامتی کونسل کو لکھے گئے خط میں مقبوضہ کشمیر میں بھارتی فوجی جارحیت اور انسانی حقو ق کی خلاف ورزیوں پر  تشویش کا اظہار  کیا  ہے۔

وزیر خارجہ نے اپنے خط میں اِس امر پر افسوس کا اظہار کیا کہ بھارت سات دہائیوں سے زائد عرصے سے مقبوضہ وادی کے عوام کو حق خودارادیت دینے سے انکاری ہے۔انہوں نے یاد دلایا کہ بھارت کے پانچ اگست 2019کے غیر قانونی او ر یکطرفہ اقدامات مقبوضہ علاقے کی آبادی کا تناسب تبدیل کرنے کی جاری مہم اقوام متحدہ کی سلامتی کونسل کی قراردادوں او ر عالمی قانون ،خاص طور پر چوتھے جنیوا کنونشن کی کھلی خلاف ورزی ہے۔

شاہ محمود قریشی  نے پاکستان کو بدنام کرنے اور کشمیر کی تحریک کو دبانے کیلئے بے بنیاد الزامات کے تحت کارروائی کرنے کے ناپاک بھارتی عزائم سے بھی عالمی برادری کو خبر دار کیا۔

انہوں نے اس امر کا بھی اعادہ کیا کہ یہ بھارت کی ذمہ داری ہے کہ وہ اپنے غیر قانونی زیر قبضہ جموں و کشمیر میں پانچ اگست دو ہزار اُنیس کے بعد سے کیے جانے والے یکطرفہ اورغیر قانونی اقدامات واپس لے کر اور اِس مقبوضہ علاقے میں آبادی کا تناسب تبدیل کرنے کی کوششوں کو روک کر تعمیر ی مذاکرات کیلئے ساز گار ماحول پیدا کرے۔ خط میں مسئلہ کشمیر کے کشمیری امنگوں، اقوام متحدہ قراردادوں کے مطابق حل پر بھی زور دیا گیا۔ 

اقوام متحدہ میں پاکستانی مستقل مندوب منیر اکرم کی صدر سلامتی کونسل سے ملاقات  ہوئی ، پاکستانی مستقل مندوب نے وزیر خارجہ کا خط باضابطہ صدر سلامتی کونسل ایم کیمانی کے سپرد کیا۔