اب گاڑی سے کوڑاباہر پھینکنے پر بھاری جرمانہ ہوگا

عدالت نے لاہور میں کوڑا کرکٹ کو آگ لگانے پر برہمی کا اظہار کرتے ہوئے کہا کہ لاہور میں کنٹینر ہونے چاہیے جن میں براہ راست کوڑا کرکٹ ڈالا جاسکے،آئندہ جو افسربھی آگ لگانے میں ملوث ہو اس کی ایک ماہ کی تنخواہ کاٹی جائے۔

لاہور ہائیکورٹ نے گاڑیوں سے کوڑا پھینکنے والوں کیخلاف بھی کارروائی کا حکم دے دیا،جسٹس شاہد کریم نے ریمارکس دیئے کہ  انہیں سری لنکا دورے پر معلوم ہوا کہ چینگم پھینکنے پر 50ڈالر جرمانے کی تنبیہ کی گئی ہے،کوڑا پھینکنے والوں کو جرمانے کریں گے توہی حالات ٹھیک ہوں گے.

ڈپٹی اٹارنی جنرل اسد باجوہ نے کہا کہ گاڑیوں سے کوڑا پھینکنے والوں کو پکڑنے کے لیے سی سی ٹی وی کیمروں کی مدد بھی لی جاسکتی ہے۔

جسٹس شاہد کریم نے کہا کہ سب کچھ مجھ سے ہی کرواتے رہیں گے محکمہ بھی اپنا کام کرے، تمام متعلقہ محکمے  بہتری سے متعلق سفارشات اعلیٰ افسران کو پیش کریں۔

لاہور ہائیکورٹ نے مجسٹریٹ کو ہر روز 2گھنٹے تجاوزات کیخلاف کیسز سننے کا بھی حکم دیا،انہیں ہدایت کی گئی کہ وہ  ہفتہ میں 5روز تجاوازات سے متعلقہ کیسز سنیں۔