وزارت سائنس اینڈ ٹیکنالوجی  کی اسلام آباد میں بلدیاتی انتخابات کیلئے ای وی ایم مشینیں دینے سے معذرت ، ذرائع

ذرائع کا کہنا ہے کہ  الیکشن کمیشن نے وزارت اینڈ ٹیکنالوجی سے پرائیویٹ کمپنیوں سے مشینوں کی خریداری پر تحفظات کا اظہار کیا تھا، وزارت سائنس اینڈ ٹیکنالوجی نے الیکشن کمیشن کے خط کا جواب دے دیا۔وزارت نے  الیکشن کمیشن کو جواب میں کہا ہے کہ  وزارت سائنس اینڈ ٹیکنالوجی خود مشین تیار نہیں کر سکتی،جو ماڈل مشینیں بطور ماڈل دکھائی گئی تھی وہ پرائیویٹ کمپنی کی تیار کردہ تھی۔

ذرائع کے مطابق وزارت سائنس اینڈ ٹیکنالوجی نے کہا ہے کہ  وزارت نے ابھی تک کوئی الیکٹرانک مشین نہیں خریدی، مشینوں کو پیپرا قوانین کے تحت خریدنا الیکشن کمیشن کا ہی استحقاق ہے۔ سائنس اینڈ ٹیکنالوجی  نے جواب  میں کہا ہے کہ  الیکشن کمیشن مروجہ قوانین کے تحت انتخابات کے لیے مشینوں کی خریداری کا عمل شروع کرے، الیکشن کمیشن کو ای وی ایم کے پراجیکٹ کے لیے پی سی ایس آئی آر میں  جگہ فراہم کی جائے گی۔ذرائع کا کہنا ہے کہ  وزارت الیکشن کمیشن کو ای وی ایم کے معاملے تمام قانونی تعاون کے لیے تیار ہے،

خیال رہے کہ الیکشن کمیشن نے وزارت سائنس اینڈ ٹیکنالوجی سے اپنی تیار کردہ مشینیں فراہم کرنے کا مطالبہ کیا تھا، الیکشن کمیشن نے اسلام آباد میں بلدیاتی انتخابات کے لیے وزارت سائنس اینڈ ٹیکنالوجی سے 3900 مشینیں مانگ رکھی تھی۔