ملک کے مختلف حصوں میں بارشوں کانیا سلسلہ آج سے شروع ہوگا

محکمہ موسمیات  کے مطابق  بارشیں برسانے والا سلسلہ پنجاب میں داخل ہو گیاہے ، جس کے بعد  صوبائی دارالحکومت    لاہور میں آج رات سے اتوار تک وقفے وقفے سے بارشوں کا امکان ہے۔    جبکہ گوجرانولہ، فیصل آباد، اٹک، چکوال، جہلم،   سرگودھا  سمیت  پنجاب کے دیگر اضلاع میں بھی  تیز بارش   متوقع  ہے ۔ لاہور میں  بعض مقامات پر ژ الہ باری کا بھی امکان ہے ۔

محکمہ موسمیات کے مطابق جمعرات سے اتوار کے دوران خیبر پختونخوا، گلگت بلتستان اور کشمیر میں موسلادھار بارش کے باعث لینڈ سلائیڈنگ کا بھی خطرہ ہے، جبکہ پشاور، کوہاٹ، دیر، سوات، شانگلہ، بونیر سمیت خیبر پختونخوا کے بیشتر علاقوں میں بھی بارش ہو گی۔ محکمہ موسمیات کے مطابق کشمیر اور گلگت بلتستان سمیت شمالی  بلوچستان کے بھی مختلف اضلاع میں بارش ہو سکتی ہے جن میں کوئٹہ، ژوب، زیارت اور چمن شامل ہیں۔جبکہ  صوبہ کے بیشتر علاقوں میں موسم خشک رہے گا۔ گزشتہ 24 گھنٹے کے دوران اسلام آباد، مری اور راولپنڈی میں تیز ہواؤں کے ساتھ ہلکی بارش ریکارڈ کی گئی جس کے بعد صبح کے اوقات میں موسم مزید سرد ہو گیا ہے ۔