سلامتی کونسل میانمار میں بغاوت سےمتعلق مذمتی بیان پر تقسیم ہوگئی

غیر ملکی خبر رساں ادارے کے مطابق سلامتی کونسل میانمار میں بغاوت  سےمتعلق مذمتی بیان پر تقسیم ہوگئی، چین،روس،بھارت اورویتنام  نےمذمتی بیان کےمسودےپراعتراضات اٹھادیئے،بیان کےمتن کو حتمی شکل دینے کے دوران ، چین ، روس ، ہندوستان اور ویتنام  نے  برطانوی مسودے میں ترمیم کی تجویز دی،مسودےمیں فوج پر مکمل پابندی لگانے پر زور دیا گیا ہے۔

دوسری جانب  میانمارکےشہرشہر احتجاجی مظاہرےجاری ہیں، فوجی جنتاکی مخالفت  میں ہڑتال کرنے والے ریلوے  ملازمین کےخلاف چھاپہ مارکارروائی کی گئی۔سوشل میڈیا پر پوسٹ کی گئی فوٹیج میں سیکیورٹی فورسز کو ریلوے عملے کی رہائش کے قریب  دیکھاگیا۔

میانمارکی فوج نے میڈیا پر بھی پابندیاں لگادیں۔5میڈیااداروں کے دفاتر پر چھاپے مارے ،صحافیوں کو حراست میں  لیااور کوریج پرپابندی لگادی، ادھر سینئر بھارتی عہدیدار کے مطابق ، میانمار کے 100 افراد ، جن میں زیادہ تر پولیس اہلکار شامل ہیں سرحد  پار کر کے بھارت کےعلاقےمیزورم میں پناہ لےچکےہیں،پناہ لینےوالےمیانمارکےچار افسران نے بتایاکہ  فوج نے ہمیں مظاہرین پر سیدھی گولی مارنے کی ہدایت کی   تھی لیکن اپنے ہی لوگوں پر گولی چلانے کی ہمت نہیں ہے۔

واضح رہے کہ میانمار میں فوج نے یکم فروری کی صبح جمہوری طور پر منتخب حکومت کے خلاف بغاوت کرتے ہوئے اقتدار پر قبضہ کرلیا تھا اور آنگ سان سوچی اور ان کی جماعت نیشنل لیگ فار ڈیموکریسی (این ایل ڈی) کے دیگر رہنماؤں کو حراست میں لے لیا تھا۔ میانمار میں فوجی بغاوت کیخلاف شدید احتجاج، پولیس کریک ڈاؤن سے حالات کشیدہ ہوگئے ہیں  پولیس کی فائرنگ سے اب تک کئی مظاہریں ہلاک ہو چکے ہیں جبکہ متعد مظاہرین گرفتار بھی ہیں ۔

اقوام متحدہ میں تعینات میانمار کے سفیر نے جنرل اسمبلی سے فوج کے خلاف ایکشن لینے کا مطالبہ کیا تھا تا کہ ملک میں جمہوریت بحال ہوسکے، سفیر کو فوج کے خلاف کارروائی کا مطالبہ کرنے پر فوجی حکومت نے عہدے سے برطرف کر دیا۔

گزشتہ روز بھی  میانمار کے مختلف شہروں میں جمہوریت پسند سڑکوں پر نکلے۔پولیس نے مظاہرین پر آنسو گیس کے شیل داغ دیے۔ریاست کاچین میں مظاہرین پر فائرنگ بھی کی گئی۔جس کے نتیجے میں متعدد افراد زخمی بھی ہوئے۔