میانمارمیں فوجی بغاوت، سیاسی رہنما ہلاک

تفصیلات کے مطابق میانمار میں فوجی بغاوت کے پیش نظر مظاہرے عروج پر ہیں ، اس دوران بے شمار شہری اور چند سیاسی ارکان  پولیس کی جانب سے گرفتار  کیے جا رہے ہیں ۔

گزشتہ رات  پولیس نے نیشنل لیگ فور ڈیموکریسی کے رہنما زا میت لِن کو  گرفتار کیا تھا جو  دورانِ حراست انتقال کر گئے ہیں۔ سیاسی رہنما زا میت لِن کے گھر والوں کو لاش لے جانے کے لیے مطلع کیا تاہم ہلاکت کی وجہ نہیں بتائی۔

اس سے قبل نیشنل لیگ کے ایک اور رہنما کھین مونگ لیٹ بھی حراست کے دوران ہلاک ہوگئے تھے اور ان کی ہلاکت کی وجہ بھی نہیں بتائی گئی تھی۔ نیشنل لیگ فور ڈیموکریسی کے رہنماؤں کا کہنا ہے کہ دونوں رہنماؤں کو تشدد کا نشانہ بنایا گیا۔

میانمار میں فوجی بغاوت کے خلاف مظاہروں کی رفتار دن بدن تیز ہوتی جا رہی ہے جب کہ رواں ماہ پولیس کی فائرنگ سے ہلاک ہونے والوں مظاہرین کی تعداد 80 سے تجاوز کرگئی ہے۔

یاد رہے کہ میانمار میں یکم فروری کو فوجی بغاوت کے بعد ملک میں ایک سال کے لیے ایمرجنسی نافذ کردی گئی تھی اور معزول حکمراں آنگ سان سوچی کو حراست میں لے لیا گیا تھا۔