ہمارے سینیٹرز پر دباؤ ڈالا جارہا ہے ، شواہدموجود ہیں : مریم نواز کا دعوٰی

تفصیلات کے مطابق مسلم لیگ ن کی نائب صدر  مریم نواز نے سماجی  رابطے کی ویب سائٹ ٹوئٹر پر انکشاف کیا ہے کہ ہمارے سینیٹرز کو فون کر کے کہا جا رہا ہے کہ پاکستان ڈیمو کریٹک (پی ڈی ایم) کے امیدوار کو ووٹ نہ دیں۔ انہوں نے کہا کہ ان میں سے کچھ کالز کو ثبوت کے طور پر ریکارڈ کر لیا گیا ہے۔

Our senators are being called and asked not to vote for PDM candidate. Some of them have recorded the evidence.

— Maryam Nawaz Sharif (@MaryamNSharif) March 11, 2021

واضح رہے کہ چیئرمین سینیٹ کیلئے انتخاب کل ہوگا ،   چیئرمین سینیٹ کی نشست پر صادق سنجرانی اور یوسف رضا گیلانی کے درمیان مقابلہ ہے ۔  یوسف رضا گیلانی کے الیکشن جیتنے کے بعد بلاول زرداری نے اعلان کیا تھا کہ یوسف رضا گیلانی ہی چیئرمین سینیٹ کے امیدوار ہوں گے ۔ اپوزیشن جماعتوں کے اتحاد پاکستان ڈیموکریٹک موومنٹ نے  ڈپٹی چیئرمین سینیٹ کے لیے جمعیت علمائے اسلام (ف) کے مولانا عبدالغفور حیدری کو نامزد کیا  ہے۔

کل ہونے والے سینیٹ انتخابات  میں چئیرمین اور ڈپٹی چئیرمین سینیٹ کا انتخاب خفیہ بیلٹ کے ذریعے ہو گا  جبکہ  سینٹ سے 52 سینیٹرز آج ریٹائر ہو جائیں گے جن میں کئی شخصیات دوبارہ منتخب ہو نے میں کامیاب ہو گئی ہیں۔

48 نو منتخب ارکان سینیٹ کل حلف اٹھائیں گے جن میں تحریک انصاف کے 19، پیپلز پارٹی کے 8، بلوچستان عوامی پارٹی کے 6، مسلم لیگ (ن) کے 5، جمیعت علما اسلام ف کے 3 جب کہ ایم کیو ایم ، بی این پی مینگل اور اے این پی کے 2،2    اور مسلم لیگ ق کا ایک رکن شامل ہے۔ نو منتخب ارکان سینیٹ 12 مارچ کو 6 سال کی مدت یعنی 2021 سے 2027 تک کے لیے بطور سینیٹر حلف اٹھائیں گے۔