وزیراعظم کاحکومتی و اتحادی سینیٹرز کے اعزاز میں ظہرانہ

تفصیلات کے مطابق وزیراعظم عمران خان  سینیٹرز کے اعزاز میں ظہرانہ دینے کے لیے پی ایم ہاؤس تشریف لائے۔وزیراعظم عمران خان نے ظہرانے سے خطاب کرتے ہوئے کہا کہ بدقسمتی سے پہلے ڈھائی سال پارلیمنٹ میں اکثریت نہ ہونے کی وجہ سے قانون سازی میں مشکلات پیش آئیں،  امید ہے سینیٹ میں اکثریت کے بعد ہمارے لیے قانون سازی آسان ہوگی۔ پرانے نظام کی تبدیلی بغیر قانون سازی کے ممکن نہیں، اگلے دو سالوں میں ہماری پوری کوشش عوامی مفاد کی قانون سازی پر ہوگی۔ہماری ترجیحات عوام کو ریلیف فراہم کرنا ہے۔

وزیر اعظم کا کہنا تھا کہ مہنگائی سمیت مسائل سے آگاہ ہوں، ہم نے معیشیت کو ٹریک پر کھڑا کر دیاہے۔معیشت کا ڈھانچہ ٹھیک نہ ہو تو وقتی ریلیف کا کوئی فائدہ نہیں ہوتا،ہم ملک کو ایسا نظام دینا چاہتے ہیں جو دیرپا اور نتیجہ خیز ہو۔ایک پرانے نظام کو ختم کرکے نیا سسٹم لانے میں وقت لگتا ہے۔

وزیراعظم عمران خان نے اتحادیوں کا ذکر کرتے ہوئے کہا کہ اتحادیوں کے تحفظات سے آگاہ ہوں، اتحادیوں کو مایوس نہیں کریں گے۔ ابھی بھی ہمارے سینیٹرز کے ساتھ رابطے کیے جارہے ہیں، ہم نے نظام کو شفاف بنانا ہے تاکہ کرپشن کی گنجائش نہ ہو، انشاءاللہ ایوان بالا میں ہم کامیاب ہوں گے۔