مجھے نشانہ بنا کر بدنام کرنے کی بھونڈی کوشش کی گئی :  شہباز شریف

تفصیلات کے مطابق منی لانڈرنگ ریفرنس میں مسلم لیگ ن کے صدراور قومی اسمبلی میں اپوزیشن لیڈر  شہباز شریف  عدالت  کے روبرو پیش  ہوئے ۔ منی لانڈرنگ ریفرنس پر آج کی کارروائی  میں احتساب عدالت نے نیب کے چار گواہوں کے بیانات قلمبند کر لیے ۔  عدالت نے آئندہ سماعت پر نیب کے مزید گواہوں کو طلب کر تے ہوئے کارروائی 4  مارچ تک ملتوی  کردی ۔ 

احتساب عدالت کے باہر میڈیا سے گفتگو کرتے ہوئے ن لیگ کے صدر شہباز شریف نے کہا کہ اکتوبر 2018 ء میں نیب نے اپنے عقوبت خانے میں بلوایا تھا، اس سے پہلے بھی میں نے کئی بار سوالوں کے جواب دیئے ہیں ۔ عدالت نے تمام گرفتار ملزموں کو باعزت بری کیا، مجھے نشانہ بنا کر بدنام کرنے کی کوشش کی جاتی رہی ، صاف پانی میں بلوایا اور آشیانہ میں گرفتار کیا۔کہا گیا کہ صاف پانی میں اربوں کھربوں کا غبن کیا گیا، 

شہباز شریف کا کہنا تھا کہ صاف پانی کمپنی میں خورد برد کے الزام لگائے گئے، میں ان کے سوالنامے کے جواب دیتا رہا تھا، انہوں نے انجینئر راجہ صاحب کو گرفتار کیا وہ کئی ماہ جیل میں رہے۔

صدر ن لیگ نے کہا کہ نیب حکام الزام لگاتے تھے کہ آپ میٹنگ کیسے چیئر کرسکتے تھے، ان کا کہنا تھا کہ مجھے میٹنگ چیئر کرنے کا حق نہیں تھا، یہ پنجاب حکومت کی کمپنیاں تھیں میں ان کی میٹنگز چیئر کرسکتا تھا،  بطور وزیراعلی پنجاب کے مختلف محکموں کو چئیر کرتا تھا۔

شہباز شریف کا کہنا تھا  کہ عوام کی خدمت میں اپنا خون اور پسینہ دیا ہے، اگر میرے خلاف ایک دھیلے کی کرپشن ثابت ہو جائے تو قبر سے نکال کر تختہ دار پر لٹکا دینا، عمران نیازی  دن رات الزامات لگاتے ہیں۔

 انہوں نے حکومت پر تنقید کرتے ہوئے  کہا کہ دن رات ادویات، چینی، آٹا اور ایل این جی میں کرپشن ہو رہی ہے، وقت آئے  گا قوم ایک ایک پائی کا حساب لے گی۔ 

منی لانڈرنگ ریفرنس 

واضح رہے کہ ایف آئی اے نے شہباز شریف اور حمزہ شہباز سمیت دیگر کے خلاف 16 ارب سے زائد منی لانڈرنگ کا مقدمہ درج کررکھا ہے، ایف آئی اے نے 2021ء میں منی لانڈرنگ کا چالان عدالت میں جمع کروایا تھا۔ نیب ریفرنس میں شہباز شریف ،سلمان شہباز، حمزہ شہباز، رابعہ شہباز، نصرت شہباز کو فریق بنایا گیا ہے۔