ایئر مارشل ظہیر احمد بابر نے پاک فضائیہ کے نئے سربراہ کا عہدہ سنبھال لیا

تفصیلات کے مطابق اسلام  آباد میں پاک فضائیہ کے ہیڈ کوارٹر میں کمان کی تبدیلی کی پروقار تقریب ہوئی جس میں فضائیہ کے چاق و چوبند دستے نے سبکدوش ہونے والے اور نئے ائیر چیف کو سلامی دی۔ پاک فضائیہ کے جے ایف 17 تھنڈرطیاروں نے بھی پاک فضائیہ کے سبکدوش ہونے والے سربراہ مجاہد انور خان کو سلامی دی جس کے بعد مجاہد انور نے پاک فضائیہ کی کمان نئے سربراہ ظہیر احمد بابر کو سونپی۔

اس موقع پر تقریب سے خطاب کرتے ہوئے مجاہد انور خان نے کہا کہ پاک فضائیہ دنیا کی سب سے بہترین فضائیہ ہے ،   اس کے ہرسپاہی کوپیشہ ورانہ صلاحیتوں پرخراج تحسین پیش کرتا ہوں۔ 40سال پاک فضائیہ میں خدمات انجام دینا اعزاز کی بات ہے۔ انہوں نے کہا کہ  پاک فضائیہ ہرچیلنج کے مقابلے کےلیے تیار ہے ، ہم ہرقیمت پر دشمن کے عزائم ناکام بنائیں گے۔ قوم کے تعاون سے ملکی دفاع ناقابل تسخیرہے۔ میری دعائیں ہمیشہ پاک فضائیہ کے ساتھ ہیں۔

مجاہد انور خان  نے ائیر مارشل ظہیر احمد بابر سدھو کی صلاحیتوں پر اعتماد کا اظہار کیا اور پاک فضائیہ کی قیادت سنبھالنے پر مبارکباد دی۔

پاک فضائیہ کے نئے سربراہ ظہیر احمد بابر 16 اپریل 1965 کوگجرات میں پیدا ہوئے۔ ائیر مارشل ظہیر احمد بابر نے ائیر فورس کی جی ڈی پی برانچ میں کمیشن حاصل کیا۔ ظہیر احمد بابر نے فائٹر اسکواڈرن، آپریشنل ائیر بیس اور ریجنل ائیر کمانڈ کی قیادت کی۔ پاک فضائیہ میں خدمات پر ظہیر احمد بابر کو تمغہ امتیاز، ستارہ امتیازاور ہلال امتیاز سے نوازا گیا۔