ڈیم بنانے سے ملکی معاشی ترقی میں اضافہ ہو گا :وزیر اعظم شہباز شریف

وزیر اعظم شہباز شریف نے دیامر بھاشا ڈیم کے موقع پر تقریب سے خطاب کرتے ہوئے کہا کہ ڈیم بنانے سے ملکی معاشی ترقی میں اضافہ ہو گا اس منصوبے کو سی پیک سے منسلک کر دینا چاہیے اور اس ڈیم کی تعمیر کے لیے اربوں روپے رکھے گئے ہیں۔

انہوں نے کہا کہ دیامربھاشا ڈیم نواز شریف کے دور میں شروع کیا گیا تھا اور ڈیم سے زرعی زمینوں کی سیرابی کے ساتھ ساتھ معیشت بہتر ہو گی اور ہمیں توانائی کے بڑے منصوبوں کے بارے میں فوری سوچنا ہو گا۔

شہباز شریف نے چیئرمین واپڈا کو منصوبہ جلد مکمل کرنے کی ہدایت کرتے ہوئے کہا کہ ایف ڈبلیو او چینی کمپنی کے ساتھ مل کر اچھا کام کر رہا ہے اور امید ہے منصوبہ وقت پر مکمل ہو گا۔ تمام عالمی سرمایہ کاروں کی حوصلہ افزائی کریں گے۔

انہوں نے کہا کہ سمندر میں ضائع ہونے والے پانی کو ہر ممکن طریقے سے بچانے کی کوشش کریں گے۔ ہم ڈیم کو 2029 کے بجائے 2026 تک مکمل کرنے کی کوشش کریں گے اور چلاس میں ایک اسپتال کا قیام انتہائی ضروری ہے۔ ایک ایسا اسپتال جو ماہرین چلائیں۔

وزیر اعظم نے کہا کہ گلگت میں پہلا ایم آر آئی مشین میں نے فراہم کی اور نہ صرف چلاس بلکہ پورے علاقے کے لیے اسپتال ہو گا اور 13 کلومیٹر ٹنل کو بھی ہم بنائیں گے۔ ہمیں قوم سے جھوٹ نہیں بولنا۔

اس سے قبل وزیر اعظم شہباز شریف نے دیامر بھاشا ڈیم کا دورہ کیا۔ چیئرمین واپڈا وزیر اعظم شہباز شریف کو دیامر بھاشا ڈیم میں جاری تعمیراتی کام پر بریفنگ دی۔ وزیر اعظم نے ڈیم پر جاری تعمیراتی کام کا جائزہ لیا۔

مسلم لیگ ن کے رہنما اور سابق وزیر اعظم شاہد خاقان عباسی، خواجہ آصف اور مسلم لیگ ن کی ترجمان مریم اورنگزیب بھی وزیراعظم کے ہمراہ تھے۔

چیئرمین واپڈا نے بریفنگ میں کہا کہ منصوبے کی تکمیل سے فوڈ سیکیورٹی میں اضافہ ہو گا اور منصوبے کی تکمیل سے بجلی کی پیداوار میں بھی اضافہ ہو گا۔ 2 اعشاریہ 6 ٹریلین کی لاگت سے مختلف منصوبے مکمل کیے جا رہے ہیں۔

انہوں نے کہا کہ منصوبے کی تکمیل سے 16 ہزار سے زائد ملازمتیں پیدا ہوں گی اور ڈیم کو زلزلے سے محفوظ رکھنے کے اقدامات کو بھی مد نظر رکھا گیا ہے۔

بعد ازاں وزیرِ اعظم قراقرم ہائی وے، 3 میگاواٹ تھک پاور منصوبے اور چلاس کیڈٹ کالج کا فضائی دورہ بھی کریں گے۔