ٹیکنالوجی کے مؤثر استعمال سے عوام کو سہولیات کی فراہمی مزید سہل اور ڈیجیٹائزیشن کے عمل میں تیزی لائی جائے،وزیراعظم

اسلام آباد:وزیر اعظم شہباز شریف کا کہنا ہے کہ ٹیکنالوجی کے مؤثر استعمال سے عوام کو سہولیات کی فراہمی مزید سہل اور ڈیجیٹائزیشن کے عمل میں تیزی لائی جائے۔

تفصیلات کے مطابق وزیراعظم محمد شہباز شریف کی زیر صدارت نیشنل انفارمیشن ٹیکنالوجی بورڈ (این آئی ٹی بی) کے امور پر جائزہ اجلاس منعقد ہوا، جس میں حکومتی خدمات کو جدید ٹیکنالوجی کے ذریعے عام شہریوں تک مؤثر اور آسان انداز میں پہنچانے پر تفصیلی غور کیا گیا۔

دوران اجلاس وزیراعظم نے ہدایت دی کہ ٹیکنالوجی کے مؤثر استعمال سے عوام کو سرکاری سہولیات کی فراہمی مزید سہل بنائی جائے اور ڈیجیٹائزیشن کے عمل میں تیزی لائی جائے۔

اجلاس میں وزیراعظم نے حجاج کرام کی سہولت کے لیے اسی سال سے حج کے تمام ضروری مراحل مکمل طور پر ڈیجیٹائز کرنے کی ہدایت بھی کی۔ انہوں نے وزارت انفارمیشن ٹیکنالوجی اور دیگر متعلقہ وزارتوں کی جانب سے اسلام آباد میں شہریوں کے لیے آسان خدمت مرکز کے قیام کی تیاریوں کو سراہتے ہوئے کہا کہ ایسے مراکز سے عوام کو ایک ہی جگہ پر مختلف سرکاری خدمات میسر آئیں گی۔ 

وزیراعظم نے اوورسیز پاکستانیوں کے لیے کیو آر بیسڈ فیڈ بیک سسٹم پر بھی جلد ایک علیحدہ جائزہ اجلاس لینے کا اعلان کیا،اجلاس کو بریفنگ میں بتایا گیا کہ این آئی ٹی بی کے نئے سی ای او کی تعیناتی کے بعد ادارے کے پورے ڈھانچے کو عصری تقاضوں کے مطابق ازسرنو ترتیب دیا جا رہا ہے۔

 جبکہ اسلام آباد میں آسان خدمت مرکز کے قیام کے لیے تمام تیاریاں مکمل کر لی گئی ہیں۔ بریفنگ میں یہ بھی بتایا گیا کہ سرکاری شعبے کے تمام اداروں کے لیے ایک محفوظ نئی ایپ جلد متعارف کرائی جائے گی۔

مزید بتایا گیا کہ اسپتالوں میں بروقت اور بہتر طبی سہولیات کی فراہمی کے لیے ون پیشنٹ ون آئی ڈی کا مربوط نظام تیاری کے آخری مراحل میں ہے، جس سے اسپتالوں کی کارکردگی بہتر ہوگی اور مریضوں کی بہتر دیکھ بھال ممکن ہو سکے گی۔

بریفنگ میں یہ بھی بتایا گیا کہ بگ ڈیٹا کے استعمال سے عدلیہ کے لیے انالیٹکس ڈیش بورڈ بھی جلد تیار کیا جا رہا ہے۔ اجلاس کو آگاہ کیا گیا کہ این آئی ٹی بی اس وقت 145 سے زائد سرکاری ویب سائٹس، 126 سے زائد پورٹلز اور 31 سے زائد موبائل ایپلی کیشنز چلا رہا ہے۔

اجلاس میں وفاقی وزیر برائے اقتصادی امور احد خان چیمہ، وفاقی وزیر برائے انفارمیشن ٹیکنالوجی شزا فاطمہ خواجہ اور اعلیٰ سرکاری افسران نے شرکت کی۔