آزاد کشمیر: نئے وزیر اعظم  کا انتخاب ، قانون ساز اسمبلی کا اجلاس آج ہوگا

تفصیلات کے مطابق صدر آزاد کشمیر نے وزیراعظم کے انتخاب کیلئے اسمبلی اجلاس آج طلب کر رکھا ہے،اجلاس صبح ساڑھے 10 بجے قانون ساز اسمبلی ہال مظفر آباد میں ہوگا۔

 پاکستان تحریک انصاف نے سردار تنویر الیاس کو وزراتِ عظمیٰ کیلئے نامزد کر رکھا ہے جبکہ اپوزیشن نے وزیراعظم کے انتخاب میں بائیکاٹ کا فیصلہ کیا ہے۔

آزاد کشمیر کے آئین کے مطابق وزارت عظمیٰ کا انتخاب شو آف ہینڈ کے ذریعے ہوگا۔

ذرائع کے مطابق  تحریک انصاف 32 اراکین کے ساتھ ایوان میں سرفہرست ہے، اپوزیشن کے بائیکاٹ پر سردار تنویر الیاس بلامقابلہ وزیراعظم منتخب ہوجائیں گے ۔  تحریک انصاف کو مسلم کانفرنس کی بھی حمایت حاصل ہے، 27ارکان کی سادہ اکثریت سے وزیراعظم کا انتخاب کیا جائے گا۔

خیال رہے کہ عبدالقیوم نیازی اپنی ہی جماعت پاکستان تحریک انصاف کی جانب سے تحریک عدم اعتماد آنے پر وزارت عظمی ٰ کے عہدے سے مستعفی ہوگئےتھے۔

واضح رہے کہ آزاد کشمیرمیں 1985 سے پارلیمانی نظام چل رہا ہے۔