متنازع بیان کا معاملہ : رکن قومی اسمبلی میاں جاوید لطیف کیخلاف مقدمہ درج

تفصیلات کے مطابق مسلم لیگ ن کے رکن قومی اسمبلی  میاں جاوید لطیف کے متنازعہ بیان کے معاملے پر لاہور کے تھانہ ٹاؤن شپ میں لیگی رہنما کے خلاف مقدمہ درج کر لیا گیا۔ لیگی رہنما پر ریاست کے خلاف بغاوت کیلئے اکسانے کا مقدمہ بنایا گیا۔مقدمہ ٹاؤن شپ کے رہائشی جمیل سلیم  کی مدعیت میں درج کیا گیا ہے ۔  ایف آئی آر کے متن میں کہا گیا ہے  کہ جاوید لطیف نے ملک کی حکومت اور سالمیت کے ساتھ ریاستی اداروں کے خلاف ہرزہ سرائی کی اور  پیپلز پارٹی اور ن لیگ کے کارکنوں کے مابین نفرت کا بیج بویا۔  درخواست میں کہا گیا کہ    رکن قومی اسمبلی  نے ملک میں فساد برپا کرنے کے لیے ہزرہ سرائی کی۔

درخواست میں مزید  کہا گیا ہے کہ جاوید لطیف نے بیان دے کر ملکی قوانین کی خلاف ورزی کی، میاں جاوید لطیف نے اپنے بیان سے عوام میں خوف و ہراس پھیلایا، ایم این اے نے حکومت اور ریاستی اداروں کے خلاف بیان دے کر مجرمانہ فعل کا ارتکاب کیا ہے۔ مقدمے میں 120، 120 بی، 153، 153 اے، 500 اور505 ون بی کی دفعات شامل کی گئی ہیں۔

خیال رہے لیگی  رکن قومی اسمبلی  میاں جاوید لطیف نے ٹی وی پروگرام میں مریم نواز کو کچھ ہونے کی صورت میں پاکستان کھپے کا نعرہ نہ  لگانے کا بیان دیا تھا۔