حمزہ شہباز سے اختلافات کی خبریں شرمناک ہیں، مریم نواز

تفصیلات کے مطابق مسلم لیگ ن کی نائب صدر مریم نواز اور مولانا فضل الرحمان کی  ملاقات ہوئی ، ملاقات کے بعد میڈیا سے گفتگو کرتے ہوئے مریم نواز نے کہا کہ  کوشش ہے کہ تمام جماعتیں متحد رہیں،عمران خان کی جعلی حکومت کا مستقبل کارکردگی سے جڑا ہے، نالائقی اور نااہلی نے ملک کو اپنی لپیٹ میں لے لیا اس کاجواب عمران خان کو ہی دینا ہے، پی ڈی ایم اتنی متحد ہے کہ حکومت کو پتلی گلی سے جانے نہیں دے گی اور عوام کی مکمل نمائندگی کرے گی۔

لیگی رہنما مریم نواز نے کہا کہ پی ڈی ایم کا متفقہ فیصلہ تھا کہ سینیٹ چئیرمین کے لیے یوسف رضا گیلانی کو سپورٹ کیا جائے گا اور سینیٹ میں اپوزیشن کا لیڈر مسلم لیگ ن سے ہو گا۔کسی کی ہار جیت کے بعد اس میں تبدیلی کی کوئی گنجائش نہیں، امید کرتی ہوں کہ اصول کے تحت اسی فیصلے پر تمام جماعتیں کھڑی رہیں گی۔

مسلم لیگ ن کی نائب صدر نے میڈیا سے گفتگو کرتے ہوئے کہا کہ  بہتر ہو گا کہ ساری اپوزیشن عوام کے مطالبے پر متحد ہو، عوام میں مزید برداشت کرنے کی سکت نہیں، حمزہ شہباز سے اختلافات  کی خبریں شرمناک ہیں، جھوٹوں پر اللہ تعالی کی لعنت ہو ، 30 سال سے پراپیگنڈا کیا جا رہا ہے، بے بنیاد خبر چلانے پر اللہ کا خوف کرنا چاہیے۔

 پاکستان ڈیموکریٹک موومنٹ (پی ڈی ایم ) کے سربراہ مولانا فضل الرحمان نے کہا کہ 26 مارچ کو مریم نواز کو نیب میں طلب کیا گیا ہے، مریم نواز کی پیشی نے نیب کو بے نقاب کر دیا، ہمیشہ کہتے رہے کہ نیب ایک کٹھ پتلی ادارہ ہے، لگتا ہے کہ نیب کرپشن ختم کرنے نہیں بلکہ اداروں کی خدمت کرنے کے لیے بنا ہے۔

 مولانا فضل الرحمان نے کہا کہ  26 مارچ کو مریم نواز کی پیشی پر پی ڈی ایم کے تمام کارکنان موجود ہونگے، پی ڈی ایم متحد ہے، باہمی رابطوں کے تحت معاملات حل کیے جائیں گے۔انہوں نے کہا کہ  پیپلز پارٹی سے کہیں گے کہ وہ 9 جماعتوں کی رائے کا احترام کرے، پیپلز پارٹی کے دلائل پر غور کرنے کے لیے تیار ہیں۔