ٹیم بھارت کے خلاف مثبت اور جارحانہ کرکٹ پیش کرے گی، سلمان علی آغا

کولمبو: قومی ٹیم کے کپتان سلمان علی آغا نے بھارت کے خلاف اہم میچ سے قبل اسپنر عثمان طارق کو ٹیم کا ’’ٹرمپ کارڈ‘‘ قرار دیتے ہوئے کہا ہے کہ کامیابی کے لیے ہمیں ہر شعبے میں معیاری کرکٹ کھیلنا ہوگی۔

کولمبو میں پریس کانفرنس کرتے ہوئے سلمان علی آغا نے کہا کہ ہمارے لیے تمام کھلاڑی یکساں اہمیت رکھتے ہیں، تاہم عثمان طارق نے اپنی کارکردگی سے سب کی توجہ حاصل کی ہے۔

انہوں نے کہا کہ عثمان طارق دو مرتبہ اپنے بولنگ ایکشن کے حوالے سے کلیئر ہو چکے ہیں، اس کے باوجود اس معاملے پر باتیں ہوتی رہتی ہیں، لیکن ان چیزوں کا ان پر کوئی اثر نہیں پڑتا۔ ہم کسی کی رائے کو نہیں روک سکتے، سب کو اظہار کی اجازت ہے، لیکن ہمارا فوکس صرف کھیل پر ہے۔

انہوں نے کہاکہ ٹیم مکمل طور پر تیار ہے اور کولمبو کی کنڈیشنز سے ہم آہنگ ہو چکی ہے، پچ کے مزاج سے آگاہ ہیں اور اگر بارش کے باعث میچ کے اوورز کم ہوتے ہیں تو اس کے لیے بھی حکمت عملی تیار کی جا چکی ہے۔

انہوں نے کہا کہ ان کے لیے تمام 15 کھلاڑی اہم ہیں اور کنڈیشنز کو مدنظر رکھتے ہوئے پلیئنگ الیون کا انتخاب کیا جائے گا۔ مایہ ناز بیٹر بابر اعظم کی فارم پر اطمینان کا اظہار کرتے ہوئے سلمان علی آغا نے کہا کہ بابر رنز کر رہے ہیں، اس حوالے سے کوئی پریشانی نہیں اور امید ہے کہ وہ آئندہ میچ میں بھی عمدہ کارکردگی دکھائیں گے۔

بھارت کے خلاف ورلڈ کپ ریکارڈ سے متعلق سوال پر انہوں نے تسلیم کیا کہ ماضی میں نتائج پاکستان کے حق میں زیادہ نہیں رہے، تاہم ٹیم نے تاریخ سے سیکھا ہے اور بھرپور تیاری کے ساتھ میدان میں اترے گی۔

انہوں نے کہا کہ بھارتی ٹیم کی پوری پلئینگ الیون کے لیے باقاعدہ منصوبہ بندی کی گئی ہے۔بھارتی بیٹر ابھیشک شرما سے متعلق سوال پر قومی کپتان نے نیک خواہشات کا اظہار کرتے ہوئے کہا کہ امید ہے وہ جلد صحت یاب ہو کر اپنی ٹیم کو دستیاب ہوں گے۔سلمان علی آغا نےکہا کہ کپتانی ایک بڑی ذمہ داری ہے اور اس کے ساتھ دباؤ بھی آتا ہے کیونکہ آپ ملک کی نمائندگی کر رہے ہوتے ہیں اور سب کی نظریں آپ پر ہوتی ہیں۔ انہوں نے عزم ظاہر کیا کہ ٹیم میدان میں مثبت اور جارحانہ کرکٹ پیش کرے گی۔