چین : عمارت گرنے سے ہلاکتوں کی تعداد 53 ہوگئی  

غیر ملکی خبر رساں ادارے  کے مطابق ریاستی نشریاتی ادارے نے کئی دنوں کی امدادی کوششوں کے بعد آج چھ منزلہ عمارت منہدم ہونے سے ہونے والی ہلاکتوں کی اطلاع دی ۔  

 امدادی کارکنوں نے صوبہ ہنان میں 29 اپریل کو منہدم ہونے والی  عمارت   سے 10 زندہ بچ جانے والوں کو بحفاظت نکال لیا ہے۔

عمارت میں ایک ہوٹل ، درجنوں دکانیں اور گیسٹ ہاؤسز موجود تھےاور  عمارت کے ملبے میں درجنوں افراد دب گئے تھے ۔

رپورٹ کے مطابق عمارت منہدم ہونے کی وجہ جاننے کیلئے تحقیقات ہو رہی ہیں اور اس دوران کچھ افراد کو گرفتار بھی کیا گیا ہے ۔کمزور حفاظتی اور تعمیراتی معیارات اور مقامی حکام میں بدعنوانی چین میں کئی عمارتیں گرنے کا سبب بنی ہے۔

چانگشا میں امدادی کارکنوں نے زندگی کی علامات کا پتہ لگانے کے لیے روایتی طریقے استعمال کیے ، جن میں زور زور سے آوازیں دینا، دستک دینا، سونگھنے والے کتوں اور اس کے علاوہ ڈرونز کا استعمال بھی شامل ہے ۔ جن لوگوں کو ملبے کے نیچے جمعرات کو علی الصبح زندہ نکالا گیا وہ تقریباً 132 گھنٹے سے ملبے کے نیچے پھنسے ہوئے تھے ۔ 

چینی صدر شی جن پنگ نے امداد کی ہر ممکن کوشش اور عمارت گرنے کی مکمل تحقیقات کا حکم دیا ہے۔