پی ٹی آئی آج میانوالی میں پاور شو کرے گی

تفصیلات کے مطابق سابق وزیراعظم چیئرمین پی ٹی آئی عمران خان اپنے حلقہ انتخاب میانوالی میں آج جمعہ کو شام پانچ بجے جلسہ عام سے خطاب کریں گے ۔

 میانوالی جلسہ عمران خان کی عوامی رابطہ مہم کے سلسلہ میں ہو گا، جلسہ جنرل بس سٹینڈ گراؤنڈ میں کیا جائے گا۔  جلسے میں عمران خان کے ساتھ پی ٹی آئی کی دیگر اہم شخصیات بھی شرکت کریں گی۔

پی ٹی آئی ذرائع کے مطابق جلسے کیلئے  کینٹینر لگا کر 30 فٹ اونچا اسٹیج تیار کیاجارہا ہے ،  24 کینٹینر لگا کر بنایا گیا اسٹیج 60 فٹ لمبا اور 20 فٹ چوڑا ہے جبکہ  اسٹیج پر 200 کرسیاں  لگائی جائیں  گی۔ 

پی ٹی آئی انتظامیہ کے مطابق جلسہ گاہ میں 60 ہزار کرسیاں  لگائی جارہی  ہیں جبکہ لاری اڈہ کے سامنے گرائونڈ میں 2 لاکھ افراد کے جمع ہونے کی گنجائش ہے۔ 

سابق ڈپٹی سپیکر قاسم خان سوری پہلے ہی میانوالی پہنچ چکے ہیں ۔ جلسے میں شرکت کے لیے مختلف علاقوں سے ریلیاں پہنچیں گی ۔ چیئرمین شمس و قمر فاؤنڈیشن صاحبزادہ محمّد قاسم سیالوی بھی آج میانوالی پہنچیں گے ، قاسم سیالوی ہزاروں مریدین کے ہمراہ عمران خان کے جلسہ میں شرکت کریں گے۔ 

دوسری جانب ن لیگ بھی عوامی رابطہ مہم کیلئے تیار ہے، پنجاب اور خیبر پختونخوا میں جلسوں کا شیڈول جاری کردیا گیا ہے ، شہباز شریف، حمزہ شہباز ، مریم نواز اور دیگر رہنما خطاب کریں گے، آغاز 7 مئی کو بشام میں سیاسی پاور شو سے ہوگا، شانگلہ، صوابی، اٹک، گجرات اور اوکاڑہ میں بھی اجتماعات ہونگے۔