شہبازگل  کار حادثہ : مالک اور ڈرائیور   کو گرفتار کرلیا گیا 

جی این این کے مطابق پولیس نے موٹر وے ایم ٹو پر رہنما پی ٹی آئی شہباز گِل کی گاڑی سے ٹکرانے والی دوسری گاڑی کا پتہ لگا کر ڈرائیور اور مالک کو گرفتار کرنے کے بعد ان کا بیان ریکارڈ کرلیا۔

 پولیس کے مطابق شہباز گِل کی گاڑی سے ٹکرانے والی دوسری گاڑی مرید کے کہ رہائشی طاہر نذیر کی ہے، حادثے کا شکار کار اور ڈرائیور وجاہت علی کو تھانہ مریدکے لایا گیا ہے۔

پولیس کا بتانا ہے کہ  مالک کے بیان کے مطابق طاہر نذیر نے کار وجاہت علی نامی شخص کو کرائے پر دی تھی جو اپنی فیملی کے ساتھ اسلام آباد جاتے ہوئے حادثے کا شکار ہوگیا۔

حادثے کے وقت گاڑی وجاہت علی چلا رہا تھا، اپنے بیان میں ڈرائیور نے بتایا کہ حادثے کی جگہ رکا تھا، تاہم شہباز گِل کو گاڑی سے نکلتے دیکھا تو ڈر کر بھاگ گیا۔

پولیس کا کہنا ہے کہ ڈرائیور وجاہت سے واقعے کی مزید تفتیش جاری ہے۔

پولیس نے بتایا کہ جائے حادثہ کے شواہد اور وجاہت علی سے تفتیش کے مطابق یہ ایک عام کار حادثہ ہے ، جو ڈرائیور وجاہت علی کی غفلت کے باعث پیش آیا ۔

پولیس کا کہنا ہے کہ شہباز گِل کو جان بوجھ کر نقصان پہنچانے کی کوئی کوشش نہیں کی گئی۔وجاہت علی کو  مزید  تفتیش کیلئےحافظ آباد پولیس کے سپرد کیا جا رہا ہے۔

خیال رہے  کہ گزشتہ روز پاکستان تحریک انصاف کے رہنما شہباز گل موٹر وے پر ٹریفک حادثے میں زخمی ہو گئے تھے۔