چیئرمین سینیٹ کے نتائج کو چیلنج کرنے کیلئے درخواست تیار

تفصیلات کے مطابق  چیئرمین سینیٹ  کے نتائج کو چیلنج کرنے کیلئے درخواست تیار کرلی گئی، پیپلز پارٹی درخواست کل صبح  اسلام آباد ہائی کورٹ میں دائر کرے گی۔پاکستان پیپلزپارٹی کے رہنما  اور سینیٹر یوسف رضا گیلانی کی طرف سے فاروق ایچ نائیک اورنئیر بخاری پیش ہونگے۔

جی این این کے مطابق درخواست میں مسترد ووٹوں کے فیصلہ اور صادق سنجرانی کو ونر قرار دینے کی پریذائڈنگ افسر کی رولنگ کو چیلنج کیا جائے گا۔پولنگ کے روز  سینیٹ ہال میں خفیہ کیمروں کی تنصیب کا معاملہ بھی درخواست میں شامل کیا  گیا۔12 مارچ اور اس سے تین روز پہلے کا ویڈیو ریکارڈ بھی طلب کرنے کی استدعا کی جائے گی اور  تمام ویڈیو ریکارڈنگ طلب کرنے کی استدعا بھی درخواست کا حصہ ہوگی۔

گزشتہ ہفتے   چیئرمین سینیٹ کے انتخاب میں حکومت کی جانب سے نامزد امیدوار صادق سنجرانی نے پی ڈی ایم کے رہنما یوسف رضا گیلانی کو شکست دے کر کامیابی سمیٹ لی  تھی، حکومت کے نامزدامیدوار صادق سنجرانی  نے 48 ووٹ حاصل کر کے سینیٹ چیئرمین کا تاج اپنے نام کر لیا تھا۔پاکستان ڈیموکریٹک موومنٹ (پی ڈی ایم) کے رہنما یوسف رضا گیلانی 42 ووٹوں کے ساتھ شکست کا سامنہ کرنا پڑا جبکہ 8 ووٹ مسترد ہوئے تھے۔