سینیٹ میں حزب اختلاف کا عہدہ پاکستان پیپلزپارٹی کو ہی ملنا چاہیے، راجہ پرویز اشرف

تفصیلات کے مطابق  سابق وزیراعظم اور پی ڈی ایم کے سینئر نائب صدر راجہ پرویز اشرف کا اہم بیان سامنے آگیا۔پیپلزپارٹی کے رہنما راجہ پرویز اشرف کا کہنا ہے کہ   سینیٹ اپوزیشن لیڈر کا معاملہ اپوزیشن جماعتوں کے اتحاد میں خوش اسلوبی اور متفقہ طور پر جمہوری روایات کے مطابق طے ہو جائے گا، پاکستان پیپلزپارٹی سینیٹ میں 21 سینٹروں کے ساتھ سب سے بڑی اپوزیشن پارٹی ہے۔

 راجہ پرویز اشرف کا کہنا ہے کہ پاکستان پیپلزپارٹی  اس بات پر یقین رکھتی ہے کہ جمہوری روایات کے مطابق حزب اختلاف کا عہدہ پاکستان پیپلزپارٹی کو ہی ملنا چاہیے،قومی اسمبلی میں قائد حزب اختلاف اور پبلک اکاﺅنٹس کمیٹی کے چیئرمین کے دونوں اہم پارلیمانی عہدے ن لیگ کے پاس ہیں، پارلیمان کا تیسرا اہم عہدہ یعنی سینیٹ میں قائد حزب اختلاف کی سب سے بڑی پارٹی کو جانا چاہیے۔

سابق وزیر اعظم راجہ پرویز اشرف کا بیان میں کہنا ہے کہ پارلیمان کا تیسرا اہم عہدہ اس پارٹی کو جس کے پاس پارلیمان میں پہلے ہی دو عہدے موجود ہیں، ملنا نامناسب ہوگا، سینیٹ میں جس طرح سے سید یوسف رضا گیلانی کے سات ووٹوں کو مسترد کیا گیا تو اس کے بعد صورتحال یکسر تبدیل ہوگئی ہے،پاکستان پیپلزپارٹی کا موقف ہے کہ قائد حزب اختلاف کا عہدہ جمہوری اصولوں، غیرجانبداری اور انصاف کی بنیادوں پر دینا چاہیے۔