رانا ثناءاللہ نے نیب لاہور کے اعلامیے کووزیراعظم کی گھبراہٹ قرار دے دیا

تفصیلات کے مطابق   مسلم لیگ ن کے رہنما رانا ثنا ء اللہ نے نیب لاہور کے اعلامیے کو وزیر اعظم  عمران خان کی گھبراہٹ قرار دے دیا۔رانا ثناء اللہ نے کہا  کہ  مریم نواز شریف کی26 مارچ کو نیب نیازی گٹھ جوڑ میں سیاسی طلبی ہے،نیب سیاسی پریس ریلیز جاری کرنے سے اجتناب کرے ، اس طرح کی سیاسی بیان بازی کا کوئی جواز نہیں  ہے۔

رانا ثنا ءاللہ نے مزید کہا کہ  پہلے بھی مریم نوازشریف ،ان کی گاڑی اور پرامن کارکنان پر انتظامیہ نے پتھراو شروع کیا تھا، نیب  اعلامیہ عمران صاحب کی 26 مارچ کو تصادم کرانے کی بدنیتی پر مبنی سازش کا اعلان ہے۔

اس سے قبل  مسلم لیگ ن کی نائب صدر مریم نواز کی نیب پیشی کے  معاملہ پر  نیب نے پولیس اور رینجرز کی معاونت حاصل کرنے کا فیصلہ کیا تھا۔نیب کا کہنا تھا کہ  سکیورٹی خدشات کے پیش نظر نیب لاہور کو ریڈ زون (Red Zone) ڈکلیئر کرنے کی متعلقہ حکام سے قانون کے مطابق درخواست کی جا رہی ہے ۔

ترجمان نیب کا کہنا تھا کہ   میڈیا رپورٹس کے مطابق پر26مارچ کی پیشی کے موقع پر  بعض عناصر آئین کے مطابق سرکاری فرائض کی انجام دہی میں مبینہ طور پر رکاوٹ پیدا کرنے کی کوشش کر رہے ہیں اور  نیب لاہور کی عمارت کو نقصان پہنچانے کی اطلاعات  ہیں ۔

نیب کا مزید  کہنا تھا کہ  کسی دھمکی یا دباؤ کی پرواہ کئے بغیر ہمیشہ آئین اور قانون کے مطابق کام کیا ہے ، ملک سے بد عنوانی کے خاتمہ اور بدعنوان عناصر سے عوام کی اربوں روپے کی لوٹی گئی رقوم کی واپسی کیلئے اپنا کردار ادا کرتا رہے گا،نیب انسداد بد عنوانی کا قومی ادارہ ہے، نیب کا تعلق کسی سیاسی جماعت، گروہ یا فرد سے نہیں ہے بلکہ صرف اور صرف ریاست پاکستان سے ہے ۔