پیٹرول بحران رپورٹ، کابینہ کی آئل مارکیٹنگ کمپنیوں کے خلاف کاروائی کی منظوری

تفصیلات کے مطابق  پٹرول بحران سے متعلق فیڈرل انویسٹی گیشن ایجنسی  ( ایف آئی اے)  انکوائری کمیشن کی رپورٹ کا معاملہ،  وفاقی کابینہ نے آئل مارکیٹنگ کمپنیوں اور پٹرولیم ڈیلرز کے خلاف کاروائی کی منظوری دیدی۔ساڑھے تین ماہ کی تاخیرکے بعد کمیشن رپورٹ پر جزوی عملدرآمدکی منظوری دی گئی ہے۔

جی این این کے مطابق  کمیشن رپورٹ کے برخلاف سیکرٹری پٹرولیم سمیت دیگر افسران کو کاروائی سے بچالیا گیا، انکوائری کمیشن نے سیکرٹری پٹرولیم سمیت کئی افسران پر ذمہ داری عائدکی تھی، وفاقی کابینہ نے مطلوبہ قوانین اور قواعدوضوابط میں ترامیم کی بھی ہدایت کردی ہے۔وفاقی کابینہ کی ہدایات کی روشنی میں اوگرا کے قانون پر بھی نظرثانی کی جائے گی۔

واضح رہے کہ  گزشتہ سال   جون جولائی میں ملک میں پٹرول کی مصنوعی قلت پیدا ہوگئی تھی،  پٹرول بحران کے باعث قومی خزانے کو 25ارب روپے سے زائد نقصان پہنچاتھا۔ وفاقی حکومت نے پٹرول کی ذخیرہ اندوزی میں ملوث کمپنیوں کا پتا لگانے کے لیے انکوائری کمیشن بنایا تھا۔ تحقیقاتی کمیشن نے رپورٹ وزیراعظم کو پیش کردی تھی جس میں اوگرا کو ایکٹ آف پارلیمنٹ کے ذریعے تحلیل کرنے اور سیکریٹری پیٹرولیم کے خلاف کارروائی کی سفارش کی گئی تھی۔