وزیراعظم  کا پاک ترک تجارتی حجم 5 ارب ڈالرز تک بڑھانے کا عزم

تفصیلات کے مطابق وزیراعظم شہباز شریف نے ان خیالات کا اظہار  گزشتہ روز یونین آف چیمبرز اینڈ کموڈٹی ایکسچینجز آف ترکی (ٹی او بی بی) کے صدر رفعت Hisareiklioglu  کی طرف سے اپنے اعزاز میں دیئے گئے عشائیے سے خطاب کرتے ہوئے کیا۔

وزیراعظم شہباز شریف ان دنوں ترکی کے تین روزہ سرکاری دورے پر انقرہ میں موجود ہیں، جہاں سرمایہ کاروں سے خطاب کرتے ہوئے ترک سرمایہ کاروں کو ہر ممکن سہولیات کی فراہمی کا یقین دلایا۔ 

وزیراعظم نے کہا کہ اس تقریب میں شرکت اعزاز کی بات ہے کیونکہ یہاں پر مختلف سرمایہ کار اور کاروباری شخصیات موجود ہیں جو تجارت، سرمایہ کاری، صنعت و زراعت کے شعبوں میں نمایاں کارکردگی کا مظاہرہ کر رہے ہیں ۔ ترکی نے صدر طیب اردوان کی دانشمندانہ قیادت میں شاندار ترقی کی ہے ، ترکی کی برآمدات 270 ارب ڈالر سے زیادہ ہیں ، ترکی نے ڈیموں اور بے انفراسٹرکچر کی تعمیر پر توجہ مرکوز کی ۔ انہوں نے مشرق وسطیٰ، جنوبی افریقہ ، جنوبی ایشیا سمیت دنیا بھر میں بڑے منصوبے مکمل کئے۔ 

وزیراعظم نے کہاکہ بدقسمتی سے پاکستان اورترکی کے درمیان تاریخی دوستی کااظہار دوطرفہ تجارت سے نہیں ہوتا جو اس وقت صرف ایک ارب دس کروڑ ڈالر ہے۔ انہوں نے کہا کہ حکومت نے کاروباری شعبے کے تمام مسائل حل کردیئے ہیں ۔

انہوں نے ترکی کے سرمایہ کاروں پرزوردیاکہ وہ زراعت، آئی ٹی، ڈیری ،ٹیکسٹائل سمیت مختلف شعبوں میں سرمایہ کاری کریں ۔ پاکستان اور ترکی کے درمیان تجارتی حجم 1.1 ارب ڈالر ہے جس کو باہمی مخلصانہ اور سنجیدہ کوششوں سے آئندہ تین سال کے دوران 5 ارب ڈالر تک لے جایا جا سکتا ہے۔

وزیراعظم  نے کہا کہ دونوں ممالک کے درمیان عشروں پر محیط قریبی ، تاریخی، دوستانہ تعلقات ہیں، ترکی کی جنگ آزادی میں برصغیر کے مسلمانوں نے بڑھ چڑھ کر حصہ لیا۔ یہ ان کی ترکی کے ساتھ والہانہ محبت کا ثبوت ہے، ہمارے آبائو اجداد کو ادراک تھا کہ ہمارے دوستانہ تعلقات ہمیشہ برقرار رہیں گے۔ 

وزیراعظم نے مسئلہ کشمیر پرغیرمتزلزل حمایت کے اظہارکے علاوہ زلزلے اورسیلابوں کے دوران پاکستان سے تعاون پرترکی کے عوام اورقیادت کاشکریہ بھی اداکیا۔

انہوں نے کہا کہ پاکستان ترک سرمایہ کاروں کا دوسرا گھر ہے ، ترکی کے دشمن ہمارے دشمن ہیں ۔ وزیراعظم کے دورے کے موقع پر یونین آف چیمبرز اینڈ کموڈٹی ایکسچینجز آف ترکی (ٹوب) کی عمارت کے ٹاورز پر پاکستان اور ترکی کے بڑے بڑے پرچم آویزاں کئے گئے تھے ۔  ٹوب کے صدر نے وزیراعظم کو اپنے ادارے کی جانب سے مقامی طور پر تیار کردہ الیکٹرک وہیکل کے بارے میں آگاہ کیا۔ اس موقع پر وزیراعظم نے مہمانوں کی کتاب پر اپنے تاثرات بھی قلمبند کئے۔