یوم پاکستان کے حوالے سے اسلام آباد میں پریڈ جاری

تفصیلات کے مطابق شکرپڑیاں گراؤنڈ میں یوم پاکستان کے حوالے سے اسلام آباد میںپریڈ کا آغاز ہوگیا۔ تینوں مسلح افواج اور سکیورٹی فورسز کے دستے شریک ہیں۔ صدر مملکت ڈاکٹر عارف علوی تقریب کے مہمان خصوصی ہیں۔ جبکہ وزیراعظم عمران خان کورونا میں مبتلا ہونے کی وجہ سے شرکت نہیں کررہے ہیں ۔  تقریب میں سول و فوجی قیادت اور غیر ملکی شخصیات بھی شریک ہیں۔ پریڈ میں چاروں صوبوں، گلگت بلتستان اور آزاد کشمیرکے وفود شریک ہیں۔ پریڈ میں فلائی پاسٹ کا مظاہرہ کیا جائے گا۔ جنگی جہاز فضائی کرتب کا مظاہرہ کریں گے۔ موسم کی خرابی کے باعث 23 مارچ کو پریڈ نہیں ہوسکی تھی۔

حکومت نے 25 مارچ کو یوم پاکستان کی پریڈ کے موقع پر اسلام آباد اور راولپنڈی کے شہریوں کے لئے عام تعطیل کا اعلان کیا ہے۔ یوم پاکستان کی پریڈ کے دوران اسلام آباد اور راولپنڈی میں موبائل فون سروس بند رہے گی اور دونوں شہروں میں عام تعطیل ہے۔ جڑواں شہروں میں صبح پانچ بجے سے دو بجے تک موبائل فون سروس بند رہے گی۔ تجارتی مراکز اور دفاتر  بھی بند ہیں ۔ پریڈ کے موقع پر 375 ٹریفک اہلکار فرائض سرانجام دیں گے۔  شہر میں ہیوی ٹریفک کےداخلے پر مکمل پابندی ہے۔مری روڈ راولپنڈی سےاسلام آباد جانے والی ٹریفک کو ڈبل روڈ چوک سے نائنتھ ایونیو کی طرف موڑا جائے گا۔