سینیٹ میں اپوزیشن لیڈر کاانتخاب ،مریم نوازکی پیپلز پارٹی پر کڑی تنقید

تفصیلات کے مطابق مسلم لیگ ن کی نائب صدر مریم نواز نے لا ہور  ہائیکورٹ  کے باہر میڈیا سے گفتگو کرتے ہوئے کہا  کہ پہلی بار دیکھا  ہے کہ سینیٹ میں لیڈر آف اپوزیشن سرکاری ارکان سے مل کر بنا ہے ۔ چھوٹے سے عہدے کے لیے آپ نے باپ سے ووٹ لے لیے، اگر یہ عہدہ چاہیے تھا تو آپ نواز شریف سے بات کر لیتے، وہ آپ کو ووٹ دے دیتے، آپ نے اُن باپ سے ووٹ لیے جو اپنے باپ کی اجازت کے بغیر کسی کو ووٹ نہیں دیتا۔ان کا کہنا تھاکہ  اس بات کا نہایت افسوس ہے کہ آپ نے ایک چھوٹے سے عہدے کے لیے جمہوریت کو بہت بڑا نقصان پہنچایا ہے، عوام ایک ایک چیز دیکھ رہی ہے کہ کون جدوجہد کر رہا ہے، یہ مسلم لیگ ن کی نہیں ان لوگوں کی شکست ہے جنہوں نے ایک چھوٹے سے عہدے سے فائدہ اٹھایا۔

مریم نواز نے کہاکہ بہت خوشی  ہے کہ  اگر انہوں نے یہ لکیر کھینچ دی ہے کہ  یہ بیانیہ  مریم نواز کا بیانیہ ہے،ایک طرف وہ لوگ  کھڑے ہے جو قربانیاں دیں کر ، آئین اور قانون کی خاطر جدوجہد کر رہے ہیں ،دوسری طرف وہ لوگ ہے جو اپنے چھوٹے سے چھوٹے فائدہ کے لیے کچھ بھی کرنے کو تیار ہیں ۔انہوں نے کہاکہ اگر آپ نے تابعداری کرنی ہے تو پھر آپ کو عمران خان کی پیروی کرنی چاہیے ،  یہ نہیں ہو سکتا کہ آدھا تیتر اور آدھا بٹیر ہو۔ جب آپ سمجھتے ہیں کہ سوائے سلیکٹ ہونے کے آپ کے پاس کوئی راستہ نہیں ہے تو آپ تابعداری کرتے ہیں، آپ چاہے خود کو جتنی بھی تسلیاں لے لیں لیکن آپ کو یہ ماننا چاہیے کہ آپ کو باپ نے ووٹ دیے ہیں۔

مریم نواز نے کہا کہ حکومت کو ٹف ٹائم دینے کے لیے ن لیگ ، فضل الرحمان اور دیگر جماعتیں کافی  ہیں، جب نیب نے مجھے ٹارگٹ کیا تو کس طرح تمام جماعتوں نے اس کے خلاف جا کر اس نوٹس کو روکا، مجھے خوشی اس بات کی ہے کے تمام جماعتیں ایک ساتھ کھڑی ہے ،رہنما ن لیگ نے کہا کہ آصف زرداری نے یہ آفر کی کہ  ن لیگ چاہے تو ہم پنجاب کے اندر تبدیلی لے آئے ،ووٹ آف نو کنفیڈنس میں  ہم پرویز الہیٰ یا کسی اور کو وزیراعلیٰ بنا دیں ۔ نواز شریف نے کہا کہ اپنے بیانیے سے پیچھے نہیں ہٹیں گے  چاہے ہمیں اقتدار نہ ملے ۔ہمیں خوشی ہے اس بات  کی ہے کہ  پاکستان کی عوام جمہوریت کے ساتھ کھڑے ہیں۔

  مسلم لیگ نون کی نائب صدر مریم نواز ضمانتی مچلکے جمع کرانے لاہور ہائیکورٹ پہنچ گئیں۔لاہور ہائیکورٹ کے 2 رکنی بینچ نے 24 مارچ کو مریم نواز کی ضمانت منظور کی تھی۔

واضح رہے کہ لاہور ہائیکورٹ نے مسلم لیگ نون کی نائب صدر مریم نواز کی 12 اپریل تک عبوری ضمانت منظور کرتے ہوئے نیب کو گرفتاری سے روک دیا تھا۔عدالت نے دس لاکھ کے دو مچلکوں کے عوض مریم نواز کی ضمانت منظور کی تھی۔