ارتھ آور کی مناسبت سے وزیراعظم کی خصوصی ہدایات جاری

تفصیلات کے مطابق وزیر اعظم عمران خان کی ہدایت پر آج ارتھ آور کی مناسبت سے پرائم منسٹرآفس (ماسوائے ان چند کے جو سیکورٹی نقطہ نظر سے ضروری ہیں ) کی لائٹس کو ایک گھنٹے کیلئےبجھا دیا جائے گا۔اس حوالے سے وزیراعظم عمران خان نے اپنے ایک بیان میں کہا کہ ماحولیات کی بہتری حکومت کی اولین ترجیحات میں شامل ہے ،وزیر اعظم نے  قوم سے اپیل کی کہ صاف اور آلودگی سے پاک ماحول کیلئےحکومت کا بھرپور ساتھ دیں۔

واضح رہے کہ  زمین سے محبت کے اظہار کے لیے پاکستان سمیت دنیا بھر میں آج ’ارتھ آور‘ منایا جائے گا جس کے دوران ایک گھنٹے کے لئے تمام غیرضروری بتیاں بجھا دی جائیں گی۔ ارتھ آور منانے کا مقصد لوگوں میں عوامی  شعور اجاگر کرنا ہے کہ یہ دھرتی ہم سب کی ہے اس کی بہتری کے لیے اقدامات کرنا بھی ہم ہی کی ذمہ داری ہے۔

ارتھ آور کا آغاز 2007 میں آسٹریلیا کے شہر سڈنی سے ہوا  تھا ۔  توانائی کی اس عالمگیر بچت مہم میں حصہ لینے والے 160 سے زائد ممالک میں پاکستان کا حصہ بھی ہے، جہاں ہر سال کی طرح اس سال بھی آج رات ساڑھے 8 سے ساڑھے 9 بجے تک اہم عمارتوں کی غیر ضروری لائٹس بند کردی جائیں گی۔