چین : آئندہ 2 ہفتوں میں ہیٹ ویو کا امکان

غیر ملکی خبر رساں ادارے کے مطابق چینی محکمہ موسمیات کاکہنا ہے کہ  چین کے کچھ علاقوں میں 40 ڈگری سیلسیس سے زیادہ درجہ حرارت کاامکان ہے ۔

چین کو اس موسم گرما میں شدید موسمی تضادات کا سامنا ہے ، چین کے شمال میں گرمی کی لہر اور جنوب میں شدید سیلاب اور بارشیں ہورہی ہیں ،  ہیٹ ویو سے 250 ملین سے زیادہ لوگوں کی لپیٹ میں آنے کاخدشہ ہے ۔

 قومی موسمیاتی مرکز کے نائب سربراہ   نے اپنے بیان میں کہا  کہ اگلے  چار سے چھ دنوں تک سنکیانگ، اندرونی منگولیا ، ہیبی ، ہینان، گانسو اور شانسی کے صوبوں میں درجہ حرارت 40 ڈگری سینٹی گریڈ سے زیادہ رہے گا۔

 حکام کا کہنا ہے کہ ہیٹ ویو سے چاول ، کپاس اور مکئی کی فصلوں کو نقصان ہوسکتا ہے ۔ محکمہ موسمیات کا یہ بھی کہنا ہے کہ ہیٹ ویو سے جنگلاتی آگ لگنے کا بھی خدشہ ہے۔

چینی حکام نے ایک نیوزکانفرنس میں بتایا کہ  جون میں چین کا اوسط درجہ حرارت 1961 کے بعد سب سے زیادہ تھا،  یہ پچھلے سالوں کے اسی عرصے کے مقابلے میں 0.9 ڈگری سیلسیس زیادہ تھا۔

گزشتہ ماہ   180 ملین سے زائد پر مشتمل آبادی والے صوبوں  ہینان اور جیانگ سو   نے روزانہ بجلی کے استعمال کے نئے ریکارڈ قائم کیے ہیں۔