ٹرمپ کے ساتھ وہی ہوگا جو فرعون، نمرود اور رضا شاہ کے ساتھ ہوا،ایرانی سپریم لیڈر

تہران: ایران کے سپریم لیڈر علی خامنہ ای نے امریکی صدر ڈونلڈ ٹرمپ کو تنقید کا نشانہ بناتے ہوئے کہا ہے کہ فرعون، نمرود اور رضا شاہ کے ساتھ جو انجام ہوا، وہی ٹرمپ کے ساتھ بھی ہوگا۔

ایرانی میڈیا رپورٹس کے مطابق سوشل میڈیا پر جاری بیان میںسپریم لیڈر آیت اللہ خامنہ ای نے کہا کہ غرور میں مبتلا ایک شخص خود کو دنیا کے فیصلے کرنے کا اہل سمجھ رہا ہے، مگر اسے یہ یاد رکھنا چاہیے کہ اقتدار کے عروج پر موجود طاقتور حکمرانوں کا انجام کیا ہوا۔

بیان میں ایرنی سپریم لیڈر نے مزید کہا کہ تاریخ گواہ ہے کہ ظلم، غرور اور طاقت کے نشے میں مبتلا حکمران زیادہ دیر تک قائم نہیں رہتے۔

واضح رہے کہ ایران میں جاری مظاہروں کے دوران شہادتوں اور گرفتاریاں اب بھی بڑھ رہی ہیں۔

ایران کی سرکاری نیوز ایجنسی تسنیم کے مطابق اب تک مظاہروں میں 114 سیکیورٹی اہلکار شہید ہوچکے ہیں، جبکہ امریکی انسانی حقوق تنظیم ایچ آر اے این اے کے مطابق پچھلے دو ہفتوں میں 544 افراد مارے گئے ہیں اور 10 ہزار 681 مظاہرین کو گرفتار کیا جا چکا ہے۔

دوسری طرف فلوریڈا سے واشنگٹن واپسی کے دوران میڈیا سے گفتگو کرتے ہوئے امریکی صدر ڈونلڈ ٹرمپ نے کہا ہے کہ ایران میں فوجی کارروائی سمیت مختلف آپشن پر غور کر رہے ہیں۔

ٹرمپ نے کہا کہ ہم ایران کے لیے بہت مضبوط آپشنز پر غور کر رہے ہیں۔امریکی صدر کا کہنا تھا کہ ہماری فوج اس معاملے کا جائزہ لے رہی ہے۔

انہوں نے کہا کہ ایران میں ہم انٹرنیٹ شروع کرا سکتے ہیں، اس بارے میں مسک سے بات کریں گے، ان کا کہنا تھا کہ امریکی فوج اور میں ایران کے خلاف سخت آپشن پرغورکر رہے ہیں۔

امریکی صدر کا کہنا تھا کہ ایران میری ریڈ لائن کو عبور کرنا شروع کر رہا ہے، لگتا ہے کچھ لوگ مارے گئے ہیں جو نہیں مارے جانے چاہیے تھے۔

ڈونلڈ ٹرمپ نے کہا کہ ہم اس معاملے کو بہت سنجیدگی سے دیکھ رہے ہیں، فوج بھی دیکھ رہی ہے اور ہم کچھ بہت مضبوط آپشنز پر غور کر رہے ہیں۔