راولپنڈی عدالت نے بھی عمران ریاض خان کیس کا فیصلہ سنا دیا

راولپنڈی میں ایف آئی اے کی خصوصی عدالت کے مجسٹریٹ محمد پرویز خان نے سینئر صحافی عمران ریاض خان کیس کا محفوظ فیصلہ سناتے ہوئے کہا عمران ریاض پر ایف آئی اے کا کوئی کیس نہیں بنتا۔

اسپیشل مجسٹریٹ راولپنڈی نے سینئر اینکر پرسن پر پیکا آرڈیننس کے تحت لگائی گئی دفعات خارج کرتے ہوئے کیس واپس اٹک عدالت کو بھیج دیا ہے۔

مجسٹریٹ محمد پرویز خان نے کہا کہ یہ کیس اِس عدالت کے دائرہ اختیار میں نہیں، عمران ریاض کی ضمانت یا مقدمہ خارج کرنےکا فیصلہ اٹک عدالت کرسکتی ہے،خصوصی عدالت نے عمران ریاض خان کو آج ہی اٹک کی عدالت میں پیش کرنےکا حکم جاری کیا ہے۔

اس سے قبل خصوصی عدالت کے مجسٹریٹ پرویز خان کا کہنا تھا کہ میں ایف آئی اے کا مجسٹریٹ ہوں، مجھے جج کی کرسی اللہ نے دی ہے، جب تک وہ چاہےگا میں اس کرسی پرہوں۔

یاد رہے کہ سینئر اینکر پرسن عمران ریاض خان کو گزشتہ روز اٹک پولیس نے گرفتار کیا تھا، پولیس کا کہنا تھا کہ عمران ریاض کےخلاف اٹک میں ایف آئی آر درج ہے۔

پولیس کی جانب سے عمران ریاض خان کو اٹک کی مقامی عدالت میں پیش کیا گیا جس پر مقامی عدالت نے اپنے فیصلے میں کہا تھا کہ یہ کیس عدالت کے دائرہ اختیار میں نہیں آتا، پولیس ملزم کو راولپنڈی کی متعلقہ عدالت میں پیش کرے۔