پنجاب لینڈ ریکارڈ اتھارٹی نے انضباطی کارروائی مکمل کرتے ہوئے 34ارکان کو برخاست کر دیا

ترجمان پنجاب لینڈ ریکارڈ اتھارٹی کے مطابق مالی سال 2021-22 میں کمپیوٹرائزڈ اراضی ریکارڈ خدمات کے حجم اور سرکاری ریونیو میں اضافے کا رجحان رہا۔

پنجاب لینڈ ریکارڈ اتھارٹی کے وسیع نیٹ ورک اور جدید اصلاحات کی بدولت مالی سال 2021-22 میں مستفید صارفین، خدمات کے حجم اور سرکاری خزانہ کی آمدن میں اضافہ کا مشاہدہ کیا گیا ہے۔

اعداد و شمار کے مطابق مالی سال 2021-22 کے دوران کم و بیش 40 لاکھ صارفین کو کمپیوٹرائز فرد، انتقالات کی خدمات فراہم کی گئیں جس میں گزشتہ سال کی نسبت 15 فیصد اضافہ ریکارڈ کیا گیا ہے۔

اراضی ریکارڈ کی با سہولت اور شفاف خدمات کے توسط صوبائی حکومت ٹیکس اور سروس چارجز کی مد میں قریباً 18.6 ارب روپے سرکاری خزانہ میں جمع کیے گئے۔

کل 2,738,290 جاری کردہ فردات میں سے 16لاکھ سے زائد فردات اراضی ریکارڈ سنٹرز، 5لاکھ بذریعہ نادرا، 3لاکھ دیہی مراکز مال جبکہ بقایا دیگر سنٹرز سے جاری کی گئیں۔

اسی طرح قریباً 13لاکھ انتقالات میں ساڑھے 8لاکھ سے زائد اراضی ریکارڈ سنٹرز، 3لاکھ سے زائد دیہی مراکز مال جبکہ بقایا دیگر سنٹر سے تصدیق کیے گئے۔

ترجمان کا کہنا ہے کہ عوامی شکایات کے اندراج اور فوری حل کے لیے مخصوص ٹیم تشکیل دی گئی ہے، ادارے میں گزشتہ سال 480 موصول شدہ شکایات پر فوری کاروائی کرتے ہوئے سائلین کوریلیف فراہم کیا گیا ہے۔

علاوہ ازیں عملہ کے خلاف موصول ہونے والی شکایات کی بنا پر 48آفیسرز اور آفیشلز کے خلاف انکوائری کا آغاز کیا گیا جبکہ انضباطی کارروائی مکمل کرتے ہوئے 34ارکان کو برخاست کیا گیا۔