ضمنی انتخابات : پنجاب میں تحریک انصاف نے 20 میں سے 15 نشستوں پر میدان مارلیا 

تفصیلات کے مطابق   تخت پنجاب کیلئے تحریک انصاف نے جیت اپنے نام کرلی ، غیر حتمی و غیر سرکاری نتائج کے مطابق  تحریک انصاف 20 میں سے 15 نشستوں پر کامیاب رہی ۔ حکمران  مسلم لیگ (ن) 4 نشستوں کے ساتھ دوسرے نمبر پر رہی جبکہ ایک نشست پر آزاد امیدوار کامیاب رہا۔ 

صوبائی دارالحکومت لاہور  میں پنجاب اسمبلی کی 4 نشستوں پر ضمنی انتخابات ہوئے اور اب تک کے غیر سرکاری و غیر حتمی نتائج کے مطابق شہر کی 4 میں سے 3 سیٹیں پی ٹی آئی نے جیت لی ہیں جبکہ ایک نشست ن لیگ کے حصے میں آئی ہے۔

یوں پنجاب میں پی ٹی آئی اتحاد کو سادہ  اکثریت حاصل ہوگئی ہے اور پنجاب کے وزارت اعلیٰ کی سیٹ اب تحریک انصاف کے امیدوار کی ہی ہوگی ۔ پی ٹی آئی اتحاد نے 186 نشستیں حاصل کرلی ہیں۔ پنجاب میں پی ٹی آئی کی 176 اور مسلم لیک (ق) کی 10 نشستیں ہیں۔

گزشتہ روز پولنگ  کا آغاز صبح آٹھ بجے ہوا  جو بغیر کسی وقفے کے پانچ بجے تک جاری رہی، اس موقع پر سیکیورٹی کے سخت انتظامات کیے گئے تھے

صوبے کے 14 اضلاع کے ضمنی انتخابات میں 175 امیدوار وں کے درمیان مقابلہ رہا ۔ اس دوران مختلف  حلقوں میں پولنگ اسٹیشز پر سیاسی کارکنان کے درمیان ہاتھا پائی ،  تصادم  کے واقعات بھی رپورٹ ہوئے ۔ 

حالیہ ضمنی انتخاب کے دوران صوبے بھر کے 20 حلقوں میں ووٹنگ ٹرن آوٹ 49.69 فیصد رہا۔پاکستان تحریک انصاف 46.08 فیصد ووٹ لیکر پہلے نمبر پر رہی۔ مسلم لیگ ن نے 39.05 فیصد ووٹ حاصل کئے اور دوسرے نمبر پر رہی۔ آزاد امیدواروں نے 7.7 فیصد ووٹ حاصل کیے۔ تحریک لبیک پاکستان 5 فیصد ووٹ حاصل کر سکی۔