پی ٹی آئی فارن فنڈنگ کیس، سکروٹنی کمیٹی نے اکبر ایس بابر کی دو درخواستیں مسترد کردیں

تفصیلات کے مطابق   پی ٹی آئی غیرملکی پارٹی فنڈنگ کی تحقیقات کیلئے الیکشن کمیشن کی سکروٹنی کمیٹی کا اجلاس ختم ہوگیا،سکروٹنی کمیٹی نے اکبر ایس بابر کی زیر التوا درخواستوں کو نمٹا دیا، سکروٹنی کمیٹی نے اجلاس میں اکبر ایس بابر کی دو درخواستیں مسترد کر دیں۔

پی ٹی آئی کے مرکزی سیکرٹری مالیات سراج احمد خان کو ذاتی حیثیت میں طلب کرنے کی درخواست مسترد کر دی، سکروٹنی کمیٹی نے یو اے ای کے چار ملازمین کے بینک تفصیلات سے متعلق بھی درخواست مسترد کر دی۔

درخواستگزار اکبر ایس بابر اور پی ٹی آئی کے وکیل شاہ خاور سکروٹنی کمیٹی میں پیش ہوئے تھے،سکروٹنی کمیٹی نے 8 اپریل کو فریقین کو دوبارہ طلب کر لیا۔

پی ٹی آئی فارن فنڈنگ کیس  میں سکرونٹی کمیٹی کی پیش رفت رپورٹ جی این این  نے حاصل کرلی، سکروٹنی کمیٹی کی  رپورٹ کے مطابق اکبر ایس بابر نے اپنا کیس شواہد کیساتھ ثابت کرنا ہے،پی ٹی آئی کی مخالفت سے کوئی فرق نہیں پڑے گا، الیکشن کمیشن اکبر بابر کو دستاویزات نہ دینے کا فیصلہ دے چکا ہے، کمیشن چاہے تو اپنا حکم برقرار رکھے یا اس میں ترمیم کردے، کمیٹی ٹی او آرز میں کہیں نہیں لکھا کہ دستاویزات اکبر بابر کو دی جائیں، کمیٹی نے اکبر بابر اور وکلاء کو دستاویزات دیکھنے کیلئے دیں۔

 رپورٹ میں کہا گیا ہے کہ  ایک ایک صفحہ پر گھنٹوں لگنے سے سکروٹنی کا عمل سست روی کا شکار ہوا، اکبر بابر چاہتے ہیں ہر ٹرانزیکشن کی تصدیق انکے سامنے کی جائے، ہر ٹرانزیکشن پر اکبر بابر اعتراض کرتے رہے تو سکروٹنی میں کئی ماہ لگیں گے۔