حکومت کا پٹرول کی قیمت میں کمی کا اعلان

تفصیلات کے مطابق  وفاقی وزیر خزانہ حماد اظہر نے پریس کانفرنس  کرتے ہوئے کہا کہ پٹرول کی قیمت میں ڈیڑھ اور ڈیزل کی قیمت میں 3 روپے لیٹر کمی کریں گے۔ بھارت سے 5 لاکھ ٹن تک پرائیویٹ سیکٹر کیلئے چینی کی درآمد کو کھولنے کا فیصلہ کیا ہے، جون کے اختتام تک بھارت سے کاٹن کی درآمدات کی بھی اجازت دیں گے۔ ان کا کہنا تھا کہ تاریخ کا سب سے بڑا تجارتی خسارہ ملا تھا جس کو ہم نے سرپلس کیا، اسٹیٹ بینک کے ذخائر میں 9 ارب ڈالر کا اضافہ ہوا ہے۔ ہماری کرنسی اپنے زور پر خود کھڑی ہے اس کے استحکام کیلئے ڈالر نہیں جھونک رہے، پارلیمنٹ میں عوامی نمائندگان سے رابطہ رہے گا، عوام کے ووٹ سے آیا ہوں، واپس عوام میں جانا ہے۔

انہوں نے کہاکہ ہم نے اسٹیٹ بینک کو خود مختار کیا ہے، ہمیں صنعت اور عوام کی فلاح دیکھنی ہے، کبھی کبھی سخت فیصلے کرنے پڑتے ہیں لیکن ہمارے فیصلوں کی بنیاد پاکستان اورعوام کی فلاح ہوگی، سبسڈی کو ٹارگٹڈ کرنے کیلئے محکموں سے بات کررہے ہیں،معیشت کے چیلنجز کا احساس ہے،تمام چیزوں کو بہتر طریقے سے لیکر چلیں گے۔