وزیراعظم نے سندھ و بلوچستان میں سیلاب کی صورتحال پراجلاس طلب کرلیا

تفصیلات کے مطابق وزیراعظم شہبازشریف  کی زیرصدارت  ہونے والے اجلاس میں سیلاب متاثرین کے ریسکیو ، ریلیف اور بحالی کے اقدامات کا جائزہ لیا جائے گا جبکہ  وزیراعظم کو سیلاب متاثرین کو نقد رقوم اور زر تلافی کی ادائیگیوں پربریفنگ دی جائے گی۔

وزیراعظم کو اجلاس میں ہیلی کاپٹرزکے ذریعے امدادی کارروائیوں سے آگاہ کیا جائے گا اور بینظیرانکم سپورٹ پروگرام کے تحت 25 ہزارکی فوری نقد رقم کی فراہمی کے عمل کا جائزہ لیا جائے گا۔

گزشتہ روز وزیراعظم نے سندھ کے سیلاب متاثرین میں فوری نقد رقوم تقسیم کرنے کا حکم دیا تھا جبکہ آرمی چیف اور چیئرمین این ڈی ایم اے سے  بھی ٹیلیفون پرگفتگو  میں سندھ میں امدادی کارروائیوں سے متعلق امور پر  بات چیت کی گئی ۔

علاوہ ازیں وزیراعظم نے سندھ میں رابطہ سڑکوں اورپلوں کی تباہی کے باعث ہیلی کاپٹرزکی فراہمی کی ہدایت کی تھی۔