جاپان میں چیری بلاسم سیزن وقت سے پہلے اپنے عروج پر

تفصیلات کے مطابق جاپانی تہذیب میں چیری بلاسم پھول زندگی کی فطرت اور تجدید کے موسم کی نمائندگی کرتا ہے۔ دارالحکومت ٹوکیو میں چیری بلاسم کے درخت سفید اور گلابی رنگ کے پھولوں سے بھر گئے ہیں،تاہم اس بار   موسمیاتی تبدیلیوں کے باعث چیری کے پھول وقت سے پہلے ہی کھِلنے لگے۔ جاپان کی اوساکا یونیورسٹی کی ایک تحقیق کے مطابق کیوٹو شہر میں 2021 کا چیری بلاسم 26 مارچ کو اپنے عروج پر پہنچ گیا۔ سنہ  812 کے بعد پہلی بار چیری کے پھول اپنے وقت سے پہلے جوبن کو پہنچے ہیں ،  چیری کے پھول عموما اپریل کے وسط میں مکمل طور پر کھلنے لگتے ہیں۔

چیری کے کھلنے کے موسم کو  جاپانی زبان میں ساکورا کے نام سے بھی جانا جاتا ہے  ، یہ  پھول صرف چند دنوں کے لیے درختوں پر رہتے ہیں، لیکن ان کو معاشی اور ثقافتی لحاظ سے انتہائی اہم  اور نیک شگون کے طور پر دیکھا جاتا ہے۔ جاپان میں چیری بلاسم کے اس موسم میں دوست اور اہل خانہ ایک ساتھ جمع ہوتے ہیں  اورتحائف کا تبادلہ کرتے ہیں۔ یہی وہ وقت ہے جب اس حیرت انگیز خوبصورتی کا مشاہدہ کرنے کے لئے پوری دنیا کے سیاح جاپان میں جمع ہوتے ہیں۔ پھول کھلنے کے سیزن کی تازہ  پیشرفت پر کڑی نگرانی کی جارہی ہے ، جاپانی موسمیاتی ایجنسی نے پہلے پھولوں اور موسم کے عروج کی پیش گوئی جاری کررکھی ہے ۔

اس سال ہیروشیما میں سیزن کا آغاز 11 مارچ کو ہوا تھا جو اس سے پہلے کے 2004 کے ریکارڈ سے آٹھ دن پہلے آیا۔ سائنسدانوں کے مطابق موسمیاتی تبدیلی اور عالمی درجہ حرارت کی یہ صورتحال ان پھولوں کی بقا کو خطرے سے دوچار کرسکتی ہے اور ماحولیاتی نطام پر بھی منفی اثرات مرتب ہوسکتے ہیں۔