جلاو گھیراؤ کیس،عمران خان کی درخواست ضمانت میں 27 ستمبر تک توسیع

 سیشن عدالت اسلام آباد نے جلاو گھیراو کیس میں چیئرمین تحریک انصاف عمران خان کی عبوری درخواست ضمانت میں 27 ستمبر تک توسیع کر دی۔

میڈیا رپورٹس کے مطابق سیشن عدالت میں پی ٹی آئی لانگ مارچ کے دوران جلاو گھیراو کیس کی سماعت ہوئی،وکیل بابر اعوان نے عمران خان کی حاضری سے استثنیٰ کی درخواست دائر کر دی۔ 

عدالت نے وکیل سے استفسار کیا کہ چیئرمین پی ٹی آئی عمران خان کب پیش ہو سکتے ہیں؟ جج نے تفتیشی افسرسے استفسار کیا کہ عمران خان شامل تفتیش ہوئے ہیں؟

تفتیشی افسر نے جواب دیا کہ عمران خان بذریعہ کونسل شامل تفتیش ہوں گے ہیں،عدالت نے عمران خان کی عبوری درخواست ضمانت میں 27 ستمبر تک توسیع کر دی ہے۔

ادھر چیف جسٹس اسلام آباد ہائیکورٹ اطہر من اللہ کی سربراہی میں 5 رکنی بینچ آج عمران خان کے خلاف توہین عدالت کیس کی سماعت کرے گا جبکہ گزشتہ روز عمران خان نے 19 صفحات پر مشتمل نیا تحریری جواب اسلام آباد ہائیکورٹ میں جمع کرایا۔ 

تحریری جواب میں موقف اختیار کیا گیا ہے کہ غیر ارادی طور پر بولے گئے الفاظ پر افسوس ہے۔ عمران خان کا مقصد خاتون جج کی دل آزاری کرنا نہیں تھا۔

اگر خاتون جج کی دل آزاری ہوئی تو اس پر افسوس ہے۔ جواب میں مزید کہا گیا ہے کہ اپنے الفاط پر خاتون جج سے پچھتاوے کا اظہار کرنے پر بھی شرمندگی نہیں ہوگی۔

مجھے ضمنی جواب جمع کروانے کا موقع ملا تو پولیٹکل پوائنٹ سکورنگ کرنے والوں نے تنقید کی۔ انصاف کی فراہمی کیلئے عدلیہ بشمول ماتحت عدلیہ کو مضبوط کرنے پر یقین رکھتا ہوں۔خاتون ججز کی اعلیٰ اور ماتحت عدلیہ میں زیادہ سے زیادہ بھرتی کا حمایتی ہوں۔

عمران خان نے جواب میں لکھا کہ مجھے معلوم نہیں تھا کہ ہائیکورٹ میں شہباز گل کیس کی اپیل زیرالتوا ہے۔