موسمیاتی تبدیلی دنیا کودرپیش سب سے اہم،بڑے چیلنجزمیں سے ایک ہے : وزیراعظم

تفصیلات کے مطابق بین الپارلیمانی یونین کے صدر Duarte Pacheco سے اسلام آباد میں گفتگو کرتے ہوئے وزیراعظم شہبازشریف  نے کہا کہ حالیہ سیلاب کے باعث بڑے پیمانے پرمعاشی نقصان نے پائیدار ترقی کے اہداف حاصل کرنے کی پاکستان کی صلاحیت کو کمزورکیا ہے۔

وزیراعظم نے عالمی برادری سے کہاکہ وہ اس بڑی قدرتی آفات سے پیدا ہونے والے حالات سے نمٹنے کے لئے پاکستان کی مدد کے لئے آگے آئے۔

انہوں نے بین الپارلیمانی یونین پربھی زوردیا کہ وہ موسمیاتی تبدیلی کے خطرناک نتائج کے بارے میں آگاہی پیدا کرنے میں اپنا کردار ادا کرے اورعالمی درجہ حرارت کے نتیجے میں ترقی پذیر ممالک کو درپیش موسمیاتی بحران سے نمٹنے کیلئے عالمی برادری کو مدد کے لئے متحرک کرے۔

بھارت کے غیرقانونی زیرقبضہ جموں کشمیرمیں خصوصاً پانچ اگست 2019  کے بعد انسانی حقوق کی بدترین خلاف ورزیوں کاحوالہ دیتے ہوئے وزیراعظم نے کہاکہ اس نے بھارت کے نام نہاد جمہوری چہرے کو بے نقاب کردیاہے ۔

بین الپارلیمانی یونین کے صدرنے موسمیاتی تبدیلی کے بارے میں پاکستان کے موقف کی حمایت کی اورترقی یافتہ ممالک پرزور دیا کہ وہ کاربن کے اخراج پرقابو پانے کے لئے حکمت عملی وضع کریں۔