لاہور میں کورونا سے متاثرہ بچوں کی تعداد میں تشویش ناک اضافہ

جی این این کے مطابق ملک  میں کورونا وائرس کی تیسری لہر جاری ہے اور یومیہ کیسز اور اموات میں اضافہ دیکھا جارہا ہے۔ اس کے ساتھ ساتھ    کورونا وائرس سے بچے بھی  شدید متاثر ہونے لگے  ہیں ، لاہور کے چلڈرن اسپتال کے کورونا وارڈ میں مزید 2 بچے داخل  کروائے گئے ہیں ،جن کی عمریں 2 سال سے 6 سال کے درمیان ہیں  ۔

اسپتال انتظامیہ کے مطابق چلڈرن اسپتال میں  اب تک کورونا سے 14 متاثرہ بچے داخل ہوچکے  ہیں جن میں سے  6 کو ڈسچارج کردیا گیا ہے جبکہ 8 بچے زیر علاج ہیں جن کی حالت خطرے سے باہر ہے ۔اسپتال انتظامیہ کے مطابق کورونا وارڈ میں بچوں کے لئے مزید بیڈز لگا دیے گئے ہیں جبکہ متاثرہ بچوں کی دیکھ بھال کے لئے سٹاف میں بھی اضافہ کیا گیا ہے ۔

صوبہ پنجاب میں عالمی وبا کورونا وائرس کی تیسری لہر میں اب تک 8ہزار 520بچوں میں کورونا وائرس کی تصدیق ہوچکی ہے۔

واضح رہے کہ  ملک بھر میں  نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق گزشتہ 24 گھنٹوں میں کورونا سے مزید83 افراد چل بسے جس کے بعد اموات کی مجموعی تعداد 14 ہزار613ہوگئی ہےجبکہ ملک میں کورونا کے فعال کیسز کی تعداد 56ہزار 347ہے، اب تک کورونا کے  6 لاکھ 78ہزار 165کیسز رپورٹ ہوچکے ہیں ۔ این سی او سی کے مطابق ملک میں کورونامثبت کیسزکی شرح 10.4فیصدرہی  ہے ۔