کورونا کے وار جاری، پنجاب میں سیاحتی مقامات بند

سیکرٹری سیاحت کے مطابق سیاحتی مقامات بند کرنے کا فیصلہ کورونا کاپھیلاﺅ روکنے کے لئے کیا گیا، اسی وجہ سے اجتماعات کی حوصلہ شکنی کی جارہی ہے، انہوں نے عوام سے اپیل کی کہ ماسک پہنیں اور مناسب فاصلہ رکھیں،ان احتیاطی تدابیر کے ذریعے ہی وائرس کے پھیلاو کو روکا جا سکتا ہے۔ ادھروائرس کے پھیلاﺅ کو روکنے کیلئے خیبر پختونخوا میں 2دن بین الاضلاعی ٹرانپورٹ بند رکھنے کا فیصلہ کیا گیا ہے ۔

اس حوالے سے کے پی کے کے سیکرٹری ٹرانسپورٹ منظور خان نے بتایا کہ شہروں کے مابین پبلک ٹرانسپورٹ پر دو دن کی پابندی عائد کر دی گئی ہے۔جس کے مطابق ہفتہ اور اتوار کو ایک شہر سے دوسرے شہر تک پبلک ٹرانسپورٹ بند رہے گی۔انہوں نے کہا کہ ٹرانسپورٹ بند رکھنے کے لئے تمام ٹرانسپورٹرز کو اعتماد میں لیا گیا ہے، تاہم شہر کے اندر پبلک ٹرانسپورٹ پر پابندی نہیں ہوگی،گڈز ٹرانسپورٹ اور پرائیوٹ گاڑیوں پر پابندی کا اطلاق نہیں ہو گا۔

وزیراعلیٰ سندھ مراد علی شاہ نے بھی کہا ہے کہ کورونا وائرس کے خدشات کے پیش نظر ہم صوبے میں لاک ڈاؤن نہیں چاہتے بلکہ صرف 2 ہفتے کے لئے بین الصوبائی ٹرانسپورٹ بند کرنا چاہتے ہیں۔ترجمان کے مطابق وزیراعلیٰ مراد علی شاہ کا کہناہے کہ بین الصوبائی ٹرانسپورٹ بند ہونے سے کورونا کی تیسری لہر کا مزید پھیلاؤ رک سکتا ہے لیکن ہم بندرگاہ پر سرگرمیاں اور گڈز ٹرانسپورٹ جاری رکھنا چاہتے ہیں۔

انہوں نے مزید کہا کہ ہم اکیلے بین الصوبائی ٹرانسپورٹ بند نہیں کر سکتے، یہ فیصلہ قومی سطح پر ہونا چاہئے، این سی او سی کو بین الصوبائی ٹرانسپورٹ 2 ہفتوں کے لئے بند کرنے کی سفارش کر رہے ہیں۔ترجمان سندھ حکومت مرتضیٰ وہاب نے بھی بعد ازاں اس بات کی وضاحت کی کہ میڈیا پراس حوالے سے غلط رپورٹنگ کی جا رہی ہے کہ وزیراعلیٰ سندھ نے این سی او سی کے اجلاس میں لاک ڈاو¿ن کی کوئی تجویز پیش کی، اس قسم کی خبریں بے بنیاد ہیں۔