سہ ملکی ٹی ٹوئنٹی سیریز : نیوزی لینڈ نے پاکستان کو 9 وکٹوں سے شکست دیدی 

تفصیلات کے مطابق  پاکستان نے ٹاس جیت کر پہلے کھیلتے ہوئے مقررہ 20 اوورز میں سات وکٹوں کے نقصان پر 130 رنز بنائے تھے۔

 کیوی ٹیم نے  131 رنز کے ہدف کے تعاقب میں   فن ایلن اور ڈیون کونوے نے اننگز کا آغاز کیا اور بڑی پارٹنرشپ قائم کی ۔ دونوں اوپنرز نے پاکستانی باؤلرز کی ایک نہ چلنے دی اور تیزی سے رنز بناتے ہوئے 117 رنز کی پارٹنرشپ قائم کی ۔

ہدف کا تعاقب کرتے ہوئے نیوزی لینڈ کی پہلی وکٹ 117 رنز پر گری جب فن ایلن کو شاداب خان نے 62 رنز پر آؤٹ کیا۔

اس سے قبل کرائسٹ چرچ میں ٹاس جیت کر پاکستان کی جانب سے محمد رضوان اور کپتان بابر اعظم نے اننگز کا آغاز کیا ۔ پاکستان کی جانب سے محمد رضوان 16، بابر اعظم 21 ،  شان مسعود 14، شاداب خان 8 اور حیدر علی بھی 8 رنز بنا کر آؤٹ ہوئے ۔ 

نیوزی لینڈ کے بولر ٹم ساؤتھی، مچل سینٹنر اور بریس ویل نے دو دو کھلاڑیوں کو آؤٹ کیا جبکہ اش سوڈھی نے ایک وکٹ حاصل کی۔

کرائسٹ چرچ میں شیڈول میں یہ ٹی20 میچ دونوں ٹیموں کے درمیان دوسرا جبکہ سہ ملکی سیریز کا مجموعی طور پر چوتھا میچ ہے۔ 

دونوں ممالک کے درمیان اس سے قبل کھیلے گئے میچ میں پاکستان نے نیوزی لینڈ کو 6 وکٹوں سے ہرا دیا تھا، جبکہ نیوزی لینڈ نے اتوار کے روز بنگلہ دیش کو 8 وکٹوں سے شکست دی تھی۔