پاک بھارت ٹاکرا: چیئرمین پی سی بی محسن نقوی کی آج وزیر اعظم سے ملاقات متوقع

اسلام آباد:آئی سی سی ٹی ٹوئنٹی ورلڈ کپ میں شیڈول پاک بھارت ٹاکرے کے حوالے سے چئیرمین پاکستان کرکٹ بورڈ( پی سی بی) محسن نقوی آج وزیر اعظم شہباز شریف سے ملاقات کریں گے۔

تفصیلات کے مطابق پاک ،بھارت ٹاکرےکیلئے آئی سی سی کی تابڑتوڑکوششیں جاری ہیں، لاہور میں پی سی بی، بنگلہ دیش کرکٹ بورڈ اور آئی سی سی کی ملاقات میں پاکستان کرکٹ بورڈ حکام نے آئی سی سی حکام کو اپنے مؤقف سے آگاہ کیا۔

ذرائع کے مطابق ڈپٹی چیئرمین آئی سی سی عمران خواجہ نے پاکستان سے بھارت کے خلاف کھیلنے کی درخواست کی۔

پی سی بی نے معاملہ حکومت کے کورٹ میں ڈال دیا،چیئرمین پی سی بی وزیر اعظم سے ملاقات کریں گے،وزیر اعظم سے ملاقات کے بعد ٹی ٹوئنٹی ورلڈکپ میں بھارت کے خلاف کھیلنے کا فیصلہ ہوگا۔

خیال رہے کہ پاکستان کی جانب سے  بھارت کےخلاف میچ کےبائیکاٹ کا فیصلہ برقرار رکھنے سےآئی سی سی کوبھاری مالی نقصان ہوگا۔