گورنر کے پی کے نے الیکشن کی تاریخ نہ دی تو سپریم کورٹ جائیں گے،شاہ محمود قریشی

پاکستان تحریک انصاف کے سینیئر وائس چیئرمین شاہ محمود قریشی نے کہا ہے کہ سپریم کورٹ کے فیصلے کے بعد بھی گورنر کے پی تاریخ نہیں دے رہے، انتخابات کی تاریخ نہ دی تو سپریم کورٹ جائیں گے۔

سابق وفاقی وزیر شاہ محمود قریشی نے اسلام آباد میں میڈیا سے گفتگو کرتے ہوئے کہا کہ چیئرمین کی اجازت سے الیکشن کمیشن حاضر ہوئے، الیکشن کمیشن حکام سے اچھے ماحول میں بات ہوئی۔

انہوں نے بتایا کہ ملاقات میں تحفظات اور خدشات کا ذکر کیا اور صاف شفاف انتخابات پر بات کی، الیکشن کمیشن پر شفاف الیکشن کی بہت بڑی ذمے داری ہے۔

شاہ محمود قریشی نے کہا کہ ملاقات میں آر اوز پر کس حد تک اعتبار کرسکتے ہیں اس پر بھی بات ہوئی، ہم نے کل لاہور میں ہونے والا واقعہ بھی الیکشن کمیشن کے سامنے رکھا۔