مریم نواز آج فیصل آباد میں تنظیمی کنونشن سے خطاب کریں گی،مریم اورنگزیب

اسلام آباد: پاکستان مسلم لیگ (ن) کی سینئر نائب صدر اور چیف آرگنائزر مریم نواز آج (جمعہ کو) فیصل آباد میں تنظیمی کنونشن سے خطاب کریں گی۔

پاکستان مسلم لیگ (ن) کی ترجمان مریم اورنگزیب نے جمعہ کو اپنے بیان میں بتایا کہ مریم نواز آج دو روزہ دورہ پر فیصل آباد پہنچ رہی ہیں جہاں وہ تنظیمی کنونشن سے خطاب کریں گی۔

مسلم لیگ (ن) پنجاب کے صدر رانا ثناء اللہ خان بھی ان کے ہمراہ ہوں گے۔ کل (11 مارچ کو) فیصل آباد میں پارٹی کا تنظیمی اجلاس ہوگا جس میں پارٹی کے مقامی صدور اور جنرل سیکریٹری شرکت کریں گے۔

اجلاس میں پارٹی کے تنظیمی ڈھانچے اور کارکردگی کا جائزہ لیا جائے گا۔ انہوں نے کہا کہ مریم نواز سوشل میڈیا، خواتین اور یوتھ ونگ کے عہدیداران سے بھی ملاقات کریں گی۔

واضح رہے کہ مریم نواز نے یکم فروری سے ملک گیر تنظیمی دوروں کا آغاز کیا تھا۔ وہ بہاولپور، ملتان، ایبٹ آباد، اسلام آباد، راولپنڈی، سرگودھا، ساہیوال ڈویژنز کے دورے کر چکی ہیں۔