پنڈی بھٹیاں کے قریب بس میں آتشزدگی سے 16 افراد جان بحق ،15 زخمی

موٹر وے ایم۔فور پر کراچی سے اسلام آباد جانے والی مسافر بس میں پنڈی بھٹیاں کے قریب اچانک آگ بھڑک اٹھی جس کے نتیجے میں سے 16 افراد موقع پر جان بحق جبکہ 15افراد زخمی ہوگئے۔

موٹر ویز پولیس کی طرف سے آفیشل سماجی رابطے کی سائٹ ٹویٹر ایکس پر اتوار کی صبح جاری بیان میں بتایاگیا ہے کہ موٹر وے ایم۔فور پر انتہائی افسوس ناک واقعہ پیش آیا ہے جس میں کراچی سے اسلام آباد جانے والی مسافر بس میں پنڈی بھٹیاں کے قریب آگ بھڑک اٹھنے سے 16 افراد موقع پر جان بحق ہوگئے۔ پولیس نے بروقت امدادی کاروائیاں کرکے 15 مسافروں کو ریسکیو کر کے قریبی ہسپتال منتقل کردیا ہے

 ڈی پی او حافظ آباد ڈاکٹر فہد نے میڈیا سے گفتگو کرتے ہوئے کہا کہ کوچ کراچی سے اسلام آباد جارہی تھی پنڈی بھٹیاں انٹر چینج کے قریب موٹر وے پر ڈیزل ٹینک سے بھری پک اپ سے ٹکرا گئی، جس کی وجہ سے کوچ کو آگ لگ گئی، حادثہ کے نتیجے میں 16 افراد موقع پر جاں بحق جبکہ 15 زخمی ہیں۔ جاں بحق افراد کی میتوں اور زخمیوں کو ٹی ایچ کیو ہسپتال پنڈی بھٹیاں فیصل آباد منتقل کر دیا گیا۔

انسپکٹر جنرل نیشنل ہائی ویز اینڈ موٹروے پولیس سلطان علی خواجہ جائے حادثہ پر سے ہسپتال پہنچ گئے جہاں انہوں نے زخمیوں کی عیادت کی اور زخمیوں کو ہر ممکن مدد فراہم کرنے کے لئے موٹر وے پولیس کے افسران کو خصوصی ہدیات بھی جاری کیں۔