دہشت گردو ں نے کولاچی پولیس اسٹیشن پر حملہ کردیا

ڈی آئی خان: خیبرپختونخوا کے ضلع ڈیرہ اسماعیل خان میں بدھ کے روز دہشت گردوں نے کلاچی پولیس اسٹیشن پر حملہ کر دیا۔

تفصیلات کے مطابق آٹھ سے نو دہشت گردوں نے کلاچی تھانے پر حملہ کیا، جس کے بعد دہشت گردوں اور پولیس کے درمیان فائرنگ کا تبادلہ ہوا۔ حملے کے بعد دہشت گرد فرار ہونے میں کامیاب ہو گئے۔

پولیس حکام کے مطابق دہشت گردوں کے حملے میں کوئی جانی نقصان نہیں ہوا۔ دہشت گردوں کے تعاقب میں پولیس اور سیکورٹی فورسز کی بھاری نفری کو کلاچی روانہ کر دیا گیا۔ خیال رہے کہ گزشتہ روز بھی سیکیورٹی فورسز نے ٹانک میں فائرنگ کے تبادلے میں 10 دہشت گردوں کو ہلاک کردیا تھا۔

پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے صوبہ خیبرپختونخوا کے ضلع ٹانک کے علاقے پیزو میں خفیہ اطلاع پر آپریشن کیا، اس دوران فائرنگ کے تبادلے میں 10 دہشت گرد مارے گئے۔