وصی شاہ کو معاون خصوصی برائے امور نوجواناں کا قلم دان بھی دے دیا گیا

نگراں وزیر مملکت برائے سیاحت سید وصی احمد فاطمی کو وزیر مملکت کے عہدے کے ساتھ وزیر اعظم کے معاون خصوصی برائے امور نوجوانان کی اضافی ذمہ داریاں بھی تفویض کر دی گئی ہیں۔ نگراں وزیراعظم انوارالحق کاکڑ کی ہدایت پر وزیر سیاحت وصی شاہ کو معاون خصوصی برائے امور نوجوانان تعینات کرنے کا فیصلہ کیا گیا۔

اس سے قبل وصی شاہ پاکستان ٹورازم ڈویلپمنٹ کارپوریشن کے بورڈ آف ڈائریکٹرز کے چیئرمین کے امور کی نگرانی کر رہے تھے۔نگراں وزیر اعظم انوار الحق کاکڑ کی ہدایت پر وزیر سیاحت کے طور پر ان کی موثر کارکردگی کا اعتراف کرتے ہوئے وصی شاہ کو معاون خصوصی برائے امور نوجوانان کی ذمہ داریاں سونپی گئی ہیں۔ یہ فیصلہ نوجوانوں کی ترقی کی جانب ایک اہم قدم ہے۔

سیاحت کے وزیر نوجوانوں کی ترقی کی اہمیت کو تسلیم کرتے ہیں اور انہیں مواقع فراہم کرنے کے لئے پرعزم ہیں۔نوجوانوں کے امور کے بارے میں معاون خصوصی کے طور پر ان کی تقرری نوجوانوں کے لئے ایک نئی امید کی جانب ایک اہم قدم ہے جو ملک بھر میں نوجوانوں کی ترقی کو فروغ دینے میں اہم کردار ادا کرے گا۔وزیر سیاحت نے بطور معاون خصوصی نوجوانوں کی ترقی اور آگاہی کے لئے موثر کارکردگی کو فروغ دینے کے عزم کا اظہار کیا ہے۔